د خيبر پښتونخوا اعلی وزیر له پاکستانه د افغان کډوالو د ایستلو پر روانه لړۍ توندې نیوکې کړې او دا یې د دغه هېواد غلطه پالیسي بللې.
علي امین ګنډاپور مطبوعاتي کنفرانس ته خبرو کې ویلي، د پاکستان له لوري د افغان کډوالو جبري ایستلو سخت مخالف دی او هلته له کډوالو سره ناوړه چلن د نوموړي په ټکو نفرت خپروونکې پالیسي ده چې پاکستان به یې دروند پور پرې کړي.
هغه زیاته کړې: « دا هغه غلطې پالیسۍ وې چې له کبله یې نفرتونه خپاره شوي دي. زه یې په اوسنیو شرایطو کې سخت مخالف یم. تر هغې چې هلته ورته د ژوند کولو ښه زمینه نه وي برابره شوې، سر یې خوندي نه وي؛ په دې طریقه او داسې شړلو یې مخالف یم. هو! زه بلکل مخالف یم؛ ځکه دا پالیسي د بشر حقونو خلاف ده او دا غیر انساني پالیسي ده. د نړیوالو اصولو خلاف کړنه ده او حتا که د دې مسالې نورو اړخونو ته وکتل شي؛ بېخي له انسانیته بهر پرېکړه ده.»
د سیاسي چارو شنونکي ګنډاپور بېواکه او بې صلاحیته بولي او وایي، په پاکستان کې اصلي واک د ملکي حکومت پر ځای د پوځ او استخباراتو په لاس کې دی او د نوموړي دا څرګندونې یوازې په پښتونخوا کې د افغانانو د کنټرول او ممکنه را ولاړېدونکو ستونزو د مخنیوي هڅه ده.
د نړیوالو چارو شنونکی عزیز معارج وايي: « زموږ دوه ګاونډي هېوادونه ایران او پاکستان په ۱۹۵۱ کال د ویانا کنوانسیون د پرېکړو خلاف د کډوالو په چارو کې خلاف کړنې ترسره کوي. په ځانګړې توګه پاکستان هېڅ ډول نړیوال اصول نه مني. په دې ټول پوهېږي چې پښتونخوا د افغانستان خاوره ده او هلته افغانانو ته کډوال نه شي ویل کېدای.»
ځینې نور بیا په وايي، دا یوازې د افغان کډوالو په اړه د پاکستاني چارواکو وېشلي نظرونه دي او په عمل کې بیا دوی ټول په دغه مساله کې یوه خوله دي او په خبره یې، د کډوالو ستونزې باید د خبرو او مذاکراتو له لارې حل شي.
د سیاسي چارو شنونکی سمیر انګار وايي: « دا پالیسي چې د افغان کډوالو پر ضد طرحه شوې ده، په حقیقت کې د مرکزي فډرال حکومت او ایالتي حکومتونو ترمنځ ګډه مساله ده. دا چې د هغوی ځینې چارواکي په مطبوعاتو کې ضد او نقیض خبرې کوي، ښکاري چې دا هم د سیاسي اجنډاوو یوه برخه وي.»
د سیاسي چارو شنونکی ډاکټر زلمی افغانیار وايي: « د پاکستاني چارواکو دغه شان څرګندونې سیاسي موج سواري ده. د مهاجرت بحث یوه نړیواله موضوع ده، خو پاکستان او نور ګاونډي هېوادونه د دې پر ځای چې تقابلاتو ته د خبرو له لارې حل پيدا کړي، سوداګرو له ډمپېنګ سیسټم او کډوال له نورو نابرابریو سره مخامخ کوي. زه هیله لرم ستونزو ته د خبرو له لارې حل پیدا کړي، نه په حکومتوالۍ کې د خپلو سیاسي ګټو ترلاسه کولو لپاره د سیسټماټیکو فشارونو واردولو له لارې.»
د خيبر پښتونخوا اعلی وزیر دا څرګندونې داسې مهال کوي چې د پاکستان حکومت افغان اتباعو کارت(اې.سي.سي) لرونکو او غیر قانوني افغان کډوالو ته د مارچ تر۳۱مې پورې له دغه هېواده د وتلو وروستۍ نېټه ټاکلې ده.
