د هلمند ولایت کجکي ولسوالۍ اوسېدونکي وایي، په تېرو ۲۰ کالو کې د جګړو له امله تر ډېره له عامه خدماتو بې برخې وو او زياتوي چې په روغتيايي برخه کې اړتيا ته په کتو ورته پاملرنه نه ده شوې.
دوی وایي، د دې ولسوالۍ مرکزي روغتون امکانات کم دي او نفوس ته يې په پام اړتیا ده چې د خدمتونو د وړاندې کولو امکانات یې لا زيات شي.
د کجکي ولسوالۍ خلک د طبي وسایلو، درملو او مجربو ښځینه او نارینه ډاکټرانو د زیاتېدو غوښتنه کوي.
د کجکي ولسوالۍ یو تن اوسېدونکی ګل آغا وايي: « زموږ کلینیک ډېر کوچنی دی، ډاکټران یې لږ دي او د ناروغانو سمه درملنه په کې نه کېږي. موږ غوښتنه کوو چې دا روغتون پراخ شي او نور ډاکټران په کې وګومارل شي.»
د کجکي ولسوالۍ یو بل اوسېدونکی عبدالرشید وايي: « کله چې په عاجل حالت کې ناروغ ورولو، کومه ګټه مو ترې نه ده اخیستې. موږ یو ماشوم په عاجل حالت کې ور ورساوه، خو د امکاناتو نه شتون له امله ومړ. موږ غوښتنه کوو چې دلته نږدې یو مجهز روغتون جوړ شي.»
د دې روغتونو مسوولین وایي، هره ورځ دې روغتون ته له ٢٥٠ تر ٣٠٠ پورې ناروغان د درملنې په موخه مراجعه کوي او په خبره يې، کاري ځواک او روغتیایي وسایل یې د خلکو د زیاتوالي له امله بسنه نه کوي.
د کجکي روغتیایي مرکز مسوول احمد الله ریحان وايي: « د کلینیک په اړه باید ووایم چې دا یو لومړنی روغتیايي مرکز دی او موږ هره ورځ له ۳۰۰ تر ۳۵۰ مراجعان لرو. موږ د پرسونل له کمښت سره مخ یو او باید نور کسان هم وګومارل شي؛ ځکه د دا ډول مرکزي ساحې لپاره کم دي.»
د هلمند د عامي روغتیا ریاست مسوولین هم د خلکو غوښتنې پر ځای بولي او وایي، د پخوا پرتله یې دغه ولسوالۍ کې روغتیایي مرکزونه زیات کړي او لاهم هڅه کوي چې نور روغتیایي مرکزونه هم زیات او شته مرکزي روغتون ته ارتقا ورکړي.
د هلمند د عامې روغتیا رییس فضلي احمد شفیع وايي: « موږ هڅه کوو چې پرسونل یې زیات او نور خدمات هم ور ورسوو. موږ له وزارت مقام غوښتنه کړې چې موجوده کلینیک ته نور پرسونل او کجکي ولسوالۍ ته نور روغتیايي مرکزونه هم راکړي. موږ له خلکو سره ژمنه کړې چې دوه یا درې نوي روغتیايي مرکزونه به ورته جوړ کړو.»
د هلمند عامې روغتیا ریاست د مالوماتو له مخې، سږ کال په دې ولایت کې ١٧ بابه نوي روغتیایي مرکزونه جوړ شوې او د ٥ نورو روغتیایي مرکزونو د جوړولو کارونه ادامه لري.
