د پاکستان له خوا د تورخم لارې له بندولو ۱۷ ورځې اوړي او پر سوداګرۍ سربېره هېڅ راز تګ راتګ ته اجازه نه شته.
د دې لارې د تړلو پر مهال د دواړو غاړو سوداګرو ته میلیونونه ډالر زیان اوښتی چې دا ځل يي د مالي زیان زیاته برخه پاکستاني سوداګرو ته اوښتې ده.
د سوداګرۍ او پانګونې خونې مسوولان وايي، د تورخم لارې د تړل کېدو پرمهال د دواړو غاړو سوداګرو ته په میلیونونو ډالرو زیان اوښتی او په خبره يې، که څه هم د تورخم لارې له تړل کېدو سره اوس افغان سوداګر د خپلو تجارتي توکو د ټرانزیټ لپاره بدیلې لارې لري.
د سوداګرۍ او پانګونې خونې د مدیره پلاوي غړی خان جان الکوزی وايي: « که څه هم دا مهال د پاکستان د مېوې وخت او دوی ډېر تاوان کوي، خو زموږ خواته هم معدن ولاړ دی او دغه راز وچه مېوه او غالۍ مو بندې دي. باید ووایم چې پاکستان موږ ته اړتیا لري او موږ پاکستان ته؛ دا یوه ډېره جدي ستونزه ده او لومړی ځل هم نه دی. پاکستان په کراتو بهانې جوړې کړې او پوله یې تړلې ده.»
د الکوزي په خبره، په تېرو ۱۷ ورځو کې دواړو غاړو ته شاوخوا ۶ زره بار وړونکي موټر ایسار دي. الکوزی زیاتوي، پاکستان تل په حساسو وختونو کې د دواړو غاړو سوداګر زيانمن کړي دي.
د سوداګرۍ او پانګونې خونې د مدیره پلاوي غړی په دې اړه وايي: « په دې ورځو کې له شپږو زرو زیات په سوداګریزو توکو بار موټر ولاړ دي، خو اوس اکثریت موټر له تورخم څخه بېرته پېښو او دېخوا جلال اباد ته راغلل. د اوس لپاره د تجارتي توکو بارګیري بنده ده. زما په اند، هره ورځ موږ او دوی ته تر یو میلیون ډالرو پورې په مستقیم او غیر مستقیم ډول تاوان رسېږي.»
په ورته مهال، سوداګر وايي دا لومړی ځل نه دی چې د تورخم لارې د تړلو له امله د دواړو غاړو سوداګرو ته درانه مالي زیانونه اوړي، بلکې سوداګر په دوامداره توګه د ورته ستونزو او زیانونو له امله په دې لاره د کاروبار ادامې ته زړه نا زړه دي.
سوداګر محمد یونس ځدراڼ وايي: « د تورخم دروازه هرکله په ډېرو حساسو وختونو کې د افغان تجارانو پر وړاندې بندېږي او له امله یې زموږ سوداګر له ډېرو ستونزو سره مخامخ کېږي او اقتصادي زیانونه ور اوړي. زموږ سوداګرو او حکومت ته په کار ده چې نور د پاکستان د دروازو یا تجارت په ځای بدیلې لارې پيدا کړي.»
د تورخم لاره د پاکستان له خوا هغه مهال وتړل شوه چې د دواړو هېوادونو د پوله ساتو ځواکونو ترمنځ شخړه رامنځته شوه او په کې د مالي زیانونو ترڅنګ، ځاني مرګ ژوبله هم واوښته.
