د صنايعو او سوداګرۍ وزارت چارواکي وايي، د دې وزارت سرپرست په افغانستان کې د آذربايجان له سفير سره کتنه کې د دواړو هېوادونو ترمنځ پر اقتصادي او سوداګریزو مسایلو خبرې کړې.
د دغه وزارت ویاند اخندزاده عبدالسلام جواد وايي، په دې کتنه کې دواړو لورو خپلې ژمنې بیا تازه کړې او د دواړو هېوادونو د چارواکو ترمنځ د لیدنو پر زیاتوالي یې ټینګار وکړ.
جواد دغه راز وايي، په دې کتنه کې د وارداتو او صادراتو پر زیاتوالي خبرې وشوې او دغه راز د دواړو هېوادونو ترمنځ د سوداګرۍ او اقتصاد پر ودې او په آذربایجان کې د افغاني محصولاتو د نندارتونونو پر جوړېدو هم هوکړه وشوه.
جواد په دې اړه وايي:« د افغانستان اسلامي امارت د صنعت او سوداګرۍ وزارت سرپرست محترم نورالدین عزیزي په افغانستان کې د آزربایجان جمهوریت له سفیر محترم الهام محمدوف سره لیدنه وکړه. په دې لیدنه کې د دواړو هېوادو د چارواکو ترمنځ د شویو ژمنو د عملي کولو، د دواړو هېوادو ترمنځ د سوداګریزې راکړې ورکړې د زیاتوالي، په آذربایجان او افغانستان کې د دواړو هېوادو د تولیداتو او محصولاتو د نندارتونونو جوړولو، په افغانستان کې د پانګونې د فرصتونو په اړه له آذربایجاني پانګوالو او سوداګرو سره د مالوماتو شریکولو او د لاجورد لارې د فعاله ساتلو په اړه خبرې وشوې. د لیدنې په پای کې د دواړو هېوادو ترمنځ د راکړې ورکړې حجم د زیاتوالي او اقتصادي اړیکو د پراختیا په موخه د صادراتي توکو د لېست پر شریکولو، په آذربایجان جمهوریت کې د افغانستان د تولیداتو او محصولاتو د نندارتون پر جوړولو او د لا زیاتې همغږۍ او اړیکو په موخه د څلور کسیز ټیم پر معرفي کولو هوکړه وشوه.»
د اقتصادي چارو کارپوهان د افغانستان او آذربایجان ترمنځ د اقتصادي اړیکو ټینګښت او پراختیا د دواړو هېوادونو د اقتصادي ودې لپاره مهم ګڼي او زیاتوي، له دې سره به افغانستان وکولی شي خپل تولیدات نړیوالو او اروپايي بازارونو ته صادر کړي.
د اقتصادي چارو کارپوه عبدالنصیر رښتیا وايي: « د هغو نندارتونونو له امله چې د منځنۍ آسیا په هېوادونو کې جوړ شول، د افغانستان له داخلي شرکتونو سره لسګونه قراردادونه لاسلیک شول. موږ کولی شو په افغانستان کې تولید شوي توکي د مرکزي آسیا هېوادونو ته صادر کړو. که چېرې موږ وکولی شو له آزربایجان هېواد سره ښې اقتصادي اړیکې ولرو، بېله شکه کولی شو د دوی له لارې د اروپا له بازارونو سره وصل شو؛ په ځانګړې توګه هغه نندارتون چې ټاکل شوې په آزربایجان هېواد کې جوړ شي، خپله د دې زمینه برابروي چې د منځنۍ اسیا هېوادونه او نور د افغانستان له تولید کړیو توکو سره وپېژني او په دغو هېوادونو کې ښه بازار ترلاسه کړو.»
ځینې نور بیا د افغانستان او آذربایجان ترمنځ د اقتصادي اړیکو پراختیا یو مثبت ګام بولي او زیاتوي، له نورو هېوادونو سره د سوداګرۍ پراختیا او د بهرنۍ پانګونې له جذب سره به د افغانستان اقتصاد وده وکړي او خلکو ته به د کار زمینه هم برابره شي.
د اقتصادي چارو کارپوه نور الله عزیز وايي: « دا چې په دې وروستیو کې له آزربایجان سره په اقتصادي برخه کې یا هم د اقتصادي فرصتونو په ترلاسه کولو کې بحثونه روان دي او په هغو امکاناتو خبرې کېږي چې کولی شي د افغانستان پر اقتصاد او تجارت مثبت اغېز ولري، دا کار د افغانستان پر ګټه دی. که دا تجارتي وي یا د سوداګریزو خونو په برخه کې وي، که د راکړه ورکړې په برخه کې وي یا هم په آزربایجان کې د افغان تولیداتو لپاره د بازار موندنې په اړه، ټول د افغانستان او آزربایجان پر تجارتي اړیکو مثبت اغېز لري.»
د اسلامي امارت له بیا واکمنېدو وروسته، آذربایجان یو له هغو هېوادونو دی چې له افغانستان سره نسبتاً ښې اقتصادي او سیاسي اړیکې لري او تل یې د سرپرست حکومت استازو ته په سیمه ییزو او نړیوالو غونډو کې بلنه ورکړې.
