د ریاست الوزراء اقتصادي مرستیال ملا عبدالغني برادر اخوند پر مشرۍ د اقتصادي کمېسیون ناسته د یکشنبې پر ورځ د (۱۴۰۴ کال د لیندۍ پر ۱۸ مه) ترسره شوه.
د اسلامي امارت مرستیال ویاند حمد الله فطرت وايي، ناسته کې د کاسا زر پروژې په اړه د افغانستان برېښنا شرکت د ټاکل شوي پلاوي راپور تایید او د لازمو اقداماتو په موخه اړوند وزارتونو ته سپارښتنې وشوې.
هغه زیاته کړې: « د افغان ټرانس پروژې په تړاو د ټولګټو وزارت د اوسپنۍ پټلۍ معینیت راپور، د مناګي برېښنا بند په تړاو د افغانستان برېښنا شرکت راپور، د جواز سیر او لایسنس الکټرونیکي کولو طرحه او یو شمېر نور اقتصادي موضوعات وړاندې شوي وو چې له ډلې یې د افغان ټرانس پروژې په تړاو د ټولګټو وزارت د اوسپنې پټلۍ معینیت راپور تایید او اړوندو وزارتونو او ادارو ته یې په اړه د لازمو کړنو ترسره کولو سپارښتنه وشوه. د یادو نورو موضوعاتو په اړه هم مفصل بحثونه وشول او ځینې لازم تصامیم ونیول شول.»
دغه راز، په ناسته کې د مناګي برېښنا بند په تړاو د افغانستان برېښنا شرکت راپور او د موټرو د جوازالسیر او موټر چلولو جواز یا لایسنس الکټرونیکي کولو طرحه او یو شمېر نورو مکانيزمونو په اړه هم خبرې شوې.
د سیاسي چارو کارپوهان په هېواد کې پر بنسټیزو پروژو کار پیلول د اقتصادي ودې لپاره مهم بولي او ټینګار کوي چې د دې ترڅنګ باید بهرنۍ پانګونه هم جذب شي.
د سرپرست حکومت چارواکو له دې مخکې ویلي و چې له درېيو کلونو راهيسې حکومت د ځان بساینې په موخه پر ډېرو پروژو کار پيل کړی چې لګښت یې له ملي بودیجې ورکول کېږي.
ځیني نور کارپوهان هم د پراختیایي پروژو د کار له پیل هرکلی کوي او وایي، د دې پروژو په پیلېدو سره به د خلکو لپاره د کاري فرصتونو پر برابرېدلو سربېره، د بېوزلۍ او بېروزګارۍ کچه هم ټيټه شي.
د اقتصادي چارو کارپوه عبدالنصیر رشتیا وايي: « هغه یوازینۍ لاره چې کولی شي په هېواد کې د بېوزلۍ او بېکارۍ کچه راټیټه کړي، د پراختیايي او انکشافي پروژو په لاره اچونه ده. کله چې دغه پروژې په حرکت راځي، خلکو ته د کار زمینه برابرېږي او کله چې د کار زمینه برابره شي، بې له شکه چې د خلکو په ژوند کې مثبت بدلون راځي او دا د دې لامل کېږي چې د حکومت او ولس ترمنځ فاصلې لا پسې کمې شي.»
له دې مخکې د ټولګټو وزارت چارواکو ویلي و چې په روان زېږدیز کال کې یې د ۵۰۰ پروژو کار پیل کړی چې په نږدې وختونو کې به يې له ډلې شاوخوا ۱۴۵ پروژې ګټې اخیستنې ته وسپارل شي.
