په مزار شریف ښار کې د کورنیو تولیداتو د ودې او پياوړتیا په موخه دری ورځنی نندارتون د صنعت او سوداګرۍ وزارت په همکارۍ د يوه خصوصي شرکت له لوري پيل شوی او په کې څه باندې ١٥٠غورفو کې د کورنیو صنعتکارانو له خوا داخلي تولیدات نندارې ته اېښودل شوي دي.
د نندارتون مسوول محمد هاشم وهاج وايي: « زموږ کورني تولیدات او په لومړي سر کې د درملو څو شرکتونو خپل تولیدات نندارې ته اېښې. په دې کې روغتونونه، د غالیو او لبنیاتو تولیدوونکو، خوراکي توکو، زعفرانو، شاتو او جامو په ګډون زموږ د هېواد اکثریت تولیدات دلته شته او له ۱۲ ولایتونو په ځانګړې توګه کابل، هرات، کندهار او مزارشریف څخه شرکتونه راغلي او غرفې یې نیولې دي.»
د بلخ ځايي چارواکي د دې نندارتون موخه له کورنيو تولیداتو ملاتړ بولي او له پانګوالو غواړي چې د نورو هېوادونو پر ځای په کور دننه پانګونه وکړي.
بله خوا د بلخ خصوصي سکټور مسوولان که څه هم د حکومت له ملاتړ خوښ دي، خو د یو شمېر ستونزو د حل غوښتنه کوي.
د بلخ صنعت او سوداګرۍ ریاست مرستیال نصیر احمد نیازی وايي: « له هېواد څخه بهر کسانو غواړو چې خپل هېواد ته راشي او د وطن په آبادولو کې ونډه واخلي. زه د صنعت او سوداګرۍ ریاست په استازیتوب له ټولو هېوادوالو غواړم چې له خپلو داخلي تولیداتو ګټه واخلي.»
د بلخ د صنایع او کانونو خونې رییس امام الدین سنايي زاده وايي: « موږ ته باید د نندارتون جوړولو لپاره مناسب ځای راکړل شي. دغه ځای مناسب نه دی خو له مجبورۍ مو په کې نندارتون جوړ کړی دی.»
په ورته مهال، یو شمېر صنعتکاران چې خپل صنعتي تولیدات یې په دې نندارتون کې نندارې ته اېښي، د نندارتون جوړېدو ته خوښ دي خو وخت ناوخت په کور دننه او بهر د دا ډول نندارتونونو پر جوړېدو ټینګار لري.
صنعت کار عبدالرزاق وايي: « موږ له دغو نندارتونو ډېر خوښ یو او هیله لرو دغه شان نندارتونو لا ډېر شي او موږ وکولی شو له هېواد څخه د باندې هم نندارتون جوړ کړو.»
همدارنګه صنعت کار سلیمان ابراهیمي د نندارتون ګټې بیانوي او وايي: « د دې نندارتونو ګټه دا ده چې د تجارت لپاره اړیکې جوړېږي. یو تاجر له بل تاجر سره ویني، عام خلک راځي خپل کورني تولیدات ګوري. موږ ډېر خوښ یو او چارواکي باید دغسې نور نندارتونونه هم جوړ کړي.»
د فیصل په نوم یو تن بل صنعت کار دغه شان نندارتونونه خلکو ته د کورنیو تولیداتو د ورپېژندلو فرصت ګڼي او وايي: « دغه نندارتون د افغانستان د خلکو او ځانګړې توګه د شمال ولایتونو لپاره ډېر ګټور دی. زموږ خلک په دې نندارتون کې په دې خبرېږي چې هېواد کې مو کوم توکي تولیدېږي.»
د روان کال له پیل راهیسې دا په بلخ کې څلورم ملي نندارتون دی چې د کورنیو تولیداتو د ودې لپاره جوړېږي. ټاکل شوې په دې نندارتون پسې ورته بل نندارتون په فاریاب ولایت کې هم جوړ شي. د دغو نندارتونو موخه کورنیو تولیداتو ته وده ورکول او بازارموندنه ښودل شوې ده.
