په بلخ ولایت کې د هېواد د پرمختګ او صنعتي ودې لپاره یو بل ګام واخیستل شو.
د دې ولایت خلم ولسوالۍ کې د اوسپنې ویلې کولو، ګول سیخ او ګاډر د تولید یوې کارخونې د بنسټ ډبره د یوه ملي سوداګر له خوا د ۵۰ میلیونه امریکايي ډالرو پانګونې سره د یو شمېر حکومتي چارواکو په شتون کې کېښودل شوه.
د کارخونې مسوولین وایي، د کارخونې په جوړېدو سره به نه یوازې د هغو ځوانانو د جلا وطنۍ مخه ونیول شي چې بهر ته د مزدورۍ لپاره ځي، بلکې هېواد به د اوسپنې ویلې کولو، ګول سیخونو، ګاډرو او نورو ودانیزو توکو د تولید په برخه کې ځان بساینې ته نیږدې کړي.
د کارخونې مسوول نقیب الله نظري وايي: « د دې کارخونې ګټه دا ده چې موږ کولی شو له یوه میلي تر شپږ میلي مترو پورې ګول سیخونه، جالۍ، مېخونه، نټ او بولټ او نور توکي تولید کړو او په دې سره به د افغانستان د فولادو کړۍ تکمیل شي. له دې وروسته به اړتیا نه وي چې د مېخ په څېر ګڼ نور فولادي توکي له بهر وارد کړو.»
ورته مهال، د خصوصي سکټور مسوولین د سرپرست حکومت له ملاټر او همکاریو د مننې ترڅنګ وايي، دا مهال افغانستان د ګول سیخونو په برخه کې پر ځان بسیا دی او د پخوا پرتله د اوسپنې د قاچاق مخنیوی شوی.
د افغانستان د اوسپنې ویلې کولو ټولنې اجرائیه مشر عبدالنصیر رښتیا وايي: « موږ ته تر ټولو مهمه دا وه چې د خامو موادو له قاچاق مخنیوی وشي چې د اسلامي امارت په راتګ سره دغه کار وشو. موږ وکولی شول په سپین بولدک کې هغه ۶۰ زره ټنه راټوله شوې اوسپنه وپېرو چې ټاکل شوې وه ګاونډي هېواد ته صادره شي.»
د بلخ ولایت د کانونو او صنایعو ریاست مشر امام الدین سنایي زاده وايي: « زموږ ډېرو پانګوالو کارخونې جوړې کړې او زرګونه کسان په کې کار کوي، د دې ټولو علت ښه امنیت او د اسلامي امارت اقتصادي محوره پالیسي ده.»
په همدې حال کې د بلخ والي محمد یوسف وفا په دې پرانستغونډه کې د کارخونې جوړېدو هرکلی او ملاتړ وکړ او زیاته یې کړه، هېواد کې د پانګونې ښه زمینه برابره شوې او باید ملي سوداګر له بهر راشي او خپل هېواد کې پانګونه وکړي.
وفا په دې اړه وايي:« ملي تجارانو او صنتعکارو! خپلو وروڼو ته خبر ورکړئ او ورته ووایئ چې راشي خپل هېواد ته، د هېواد په آبادۍ او خلکو ته د کار په موندلو کې ونډه واخلي.»
د خصوصي سکټور له مالوماتو سره سم، دا مهال هېواد کې د فولادو د تولید۴۲ کارخونې فعاله دي چې په کې شاوخوا ۲۰ زرو ځوانانو ته د کار فرصتونه برابر شوي.
