په کابل کې د یکشنبې پر ورځ د ( ۱۴۰۳ کال د تلې پر ۱۵ مه) د امام ابو حنیفه درېیم ملي او نړیوال نندارتون پرانېستل شو، چې په پرانیستغونډه کې یې د اسلامي امارت یو شمېر لوړپوړو چارواکو ګډون درلود.
د ریاست الوزرا اقتصادي مرستیال ملا عبدالغني برادر اخوند دغه ډول نندارتونونه نړۍ ته د وطني تولیداتو د معرفي کولو او کيفيت ښودلو په برخه کې مهم بولي او له بهرنیو پانګوالو غواړي چې په افغانستان کې شته امنیت ته په کتو په بېلابېلو برخو کې پانګونه وکړي.
هغه په دې اړه وویل:« په دې سوداګریز نندارتون کې به د کورنیو او بهرنیو محصولاتو له پېژندنې سربېره، له یوې خوا د هېواد داخلي صنایع تقویه شي او له بلې خوا به په نندارتون کې د ګډون کوونکو هېوادونو او بهرنیو شرکتونو سره سوداګریزې اړیکې پراخه او پیاوړې شي.»
د سوداګرۍ او پانګونې خونې مرستیال یونس مومند وايي: « دا نندارتون د تجربو د تبادلې، د اقتصادي او سوداګریزو اړیکو د پياوړتیا لپاره یو بې ساری فرصت دی. دا نندارتون به د افغانستان، سیمې او نړۍ د هېوادونو ترمنځ اړیکې لا پیاوړې کړي.»
ورته مهال، یو شمېر نور چارواکي د دې نندارتون اصلي موخه د پانګونې جلب او د سیمې او نړۍ له هېوادونو سره د ښو اړیکو جوړول بولي؛ خوغوښتنه کوي چې ګاونډي هېوادونه دې اقتصاد په سیاست پورې نه تړي او افغان سوداګرو ته دې د وېزو په ورکولو کې شته ستونزې حل کړي.
د صنعت او سوداګرۍ وزارت سرپرست نورالدین عزیزي وايي: «دا نندارتون د افغانستان او نورو هېوادونو د صنعتي او تجارتي تولیداتو او ظرفیتونو د معرفي کولو لپاره یو فرصت دی. موږ نور هېوادونه د هغو توکو د معرفي کولو لپاره را بللي چې دلته افغانستان کې نه تولیدېږي. د دې نندارتون اصلي موخه د داخلي بازار پیاوړي کول، د پانګونې لپاره د مناسب بستر چمتو کول، د کورنیو محصولاتونو لپاره بازار موندل، د سیمې او نړۍ له هېوادونو سره د تجارتي راکړه ورکړې زیاتول دی.»
د بهرنیو چارو وزارت سیاسي معین شېر محمد عباس ستانکزی وايي: «موږ له خپل ګاونډي پاکستان څخه جدي هیله لرو چې هېڅکله سیاست له اقتصاد سره ونه تړي او هڅه وکړي د هغو کسانو پر وړاندې خپلې پولې خلاصې پرېږدي چې تجارت کوي، هم دوی او هم موږ ته ګټه رسوي.»
چارواکي د هېواد په بندرونو کې د پرمختللیو سکنرونو د نصب او د وارداتي توکو د کیفیت چک کولو او دغه راز د درملو ساتنې لپاره د سړو خونو له جوړولو خبر ورکوي.
د مالیې وزارت مرستیال وايي: « موږ د لویو بندرونو په سیسټمونو کې ډېر لوی سهولتونه رامنځته کړي، له تېر نظام څخه راپاتې سیسټمونو کې مو زیات تغییرات راوستي او اپډېټ کړي مو دي.»
د کانونو او پټرولیم وزارت سرپرست هدایت الله بدري وايي: «جوړ شوی نندارتون د هېواد د قتصادي ودې او کورنیو محصولاتو د معرفي کولو لپاره یوه بېلګه ده.»
د امام ابوحنیفه درېیم ملي نړیوال نندارتون کې وطني تولیدات، لاسي صنایع او نور بېلابېل توکي نندارې ته اېښودل شوي.
د نندارتون له ټولو۷۰۰ غرفو څخه۳۰۰ غرفې د بهرنیو سوداګرو او تولیداتو لپاره ځانګړې شوې او ۴۴۳ بهرنیو کسانو په کې برخه اخیستې ده.
د نندارتون ګډونوال سید همایون غریبمل وايي: «د وطني او داخلي تولیداتو دا ډول نندارتونونه باید لا زیات شي. دا زموږ د اقتصادي پیاوړتیا او کورنیو تولیداتو لپاره ډېر ارزښت لري. په دې سره زموږ پانګوالو او بزرګونو ته ډېره ګټه رسي.»
د نندارتون ګډونواله رویا محمدي وايي: «نندارتونونه زموږ لپاره ښې لاسته راوړنې لري. موږ کولی شو ولایتي قراردادونه واخلو او پېرودونکي جذب کړو.»
د نندارتون یو تن ایرانی ګډونوال وحید سرګزي وايي: «په دې نندارتون کې ښه ظرفیتونه شته او ایراني تاجران باید له دې امنیتي او تجارتي ظرفیت څخه ګټه واخلي.»
دا په داسې حال کې ده چې د سرپرست حکومت له واک ته رسېدو راهیسې دا درېیم ملي نړیوال نندارتون دی چې جوړېږي.
له دې وړاندې په جوړو شویو نندارتونونو کې د نورو هېوادونو له سوداګرو سربېره د میلیونونو ډالرو په ارزښت د سوداګرۍ هوکړه لیکونه هم لاسلیک شوي وو.
