په ګاونډي پاکستان کې یو ځل بیا جګړو زور اخیستی او یوازې په تېرو درېیو ورځو کې د بېلابېلو چاودنو او وسله والو بریدونو له امله ۴۸ تنه وژل شوي او لسګونه نور ټپيان شوي دي.
د راپورونو له مخې، دغه چاودنې او برېدونه په خیبر پښتونخوا، دېره اسماعیل خان، پنجاب ایالت او ځینو نورو سیمو کې شوي دي.
پاکستاني رسنیو خبر ورکړی، چې یوازې د روانې اګست میاشتې په ۲۲ نېټه په دېره اسماعیل خان کې پر پاکستاني پولیس برید له کبله ۳۰ تنه شوي او لسګونه نور ټپيان شوي دي.
همدارنګه، د تېرې پنجشنبې په ورځ په خیبر پښتونخوا او د پاکستان په پنجاب ایالت کې د دووجلا وسله والو بریدونو له امله یو ځايي مشر او د ښوونځي دوه زده کوونکي وژل شوي او پنځه نور ټپیان دي.
د یو بل خبر له مخې، د روانې اګست میاشتې په ۲۳ نېټه د پنجاب ایالت په رحیم یارخان سیمه کې وسله والو غلو په یوه راکېټي برید کې ۱۱ پولیس سرتېري وژلي او ۱۱ نور یې ټپيان کړي دي.
د پاکستان لومړي وزیر شهباز شریف، د پنجاب اعلی وزیرې مریم نواز او د پاکستان کورنیو چارو وزیر یاد بریدونه غندلی او له امنیتي ادارو یې غوښتي، چې د وسلوالو د نیولو په برخه کې کوټلي ګامونه پورته کړي.
د پنجاب اعلی وزیرې مریم نواز پر خپله ایکس پاڼه د پنجاب برید غندلی او د غچ اخیستلو خبرداری یې ورکړی.
هغې زیاته کړې:« په ماچکه سیمه کې د غلچکي ډلو له خوا د راکېټ په برید کې ۱۱ تنه پولیس سرتېري وژل شوي؛ دا واقعاً ډېر د افسوس وړ کار دی، خو دا به بې ځوابه پاتې نه شي.»
په دې وروستیو کې د پاکستان امنیتي حالات ورځ بلې ته خراب کېږي، وسله والو ډلو نه یوازې په دې هېواد کې خپلو بریدونو ته زور ورکړی بلکې خپلې تګلارې یې هم بدلې کړې دي.
که څه هم په پاکستان کې د وروستیو خونړیو بریدونو پړه چا نه ده منلې، خو د دې هېواد حکومت تل ګوته د پاکستاني طالبانو تحریک (ټي.ټي.پي) ته نیسي او تور لګوي چې ټي.ټي.پي د افغانستان خاوره د پاکستان پر ضد کاروي، هغه تور چې اسلامي امارت تل رد کړی دی.
