د خوړو او درملو ملي ادارې چارواکو په یوه خبري کنفرانس کې د تېر یوه کال کړنې او د راتلونکې پنځه کلونو ستراتیژیک پلان د رسنيو له لارې له خلکو سره شريک کړ.
چارواکي وايي، لا هم ځينې کسان هڅه کوي چي هېواد ته بې کیفیته درمل وارد کړي خو په خبره يې د خوړو او درملي ملي اداره توانېدلې، چې د یادو بي کیفیته درملو د واردولو ۸۰ سلنه مخه ونیسي.
دوی زياتوي، لا هم ۲۰ سلنه بې کیفیته درمل هېواد ته واردېږي او د نوي جوړ شوي ستراتيژيک پلان له مخې په ګمرکونو کې د معياري لابراتوارونو له فعالېدو سره سم به یې بشپړه مخنيوی وکړي.
د خوړو او درملو ملي ادارې سرپرست عبدالباري عمر وايي: « موږ الحمدالله په دې برخه کې ډېر کار کړی دی، ۸۰ سلنه دا برخه کنټرول ده او ۲۰ سلنه اوس هم منو چې په بېلا بېلو لارو به کم کیفیته درمل راواردېږي.»
عبدالباري وايي، په ګمرکونو کي د لابراتوارونو فعالولو لړۍ یي په چټکۍ روانه کړې، چي په ترڅ کې یې په کندهار کې د درملو د کنټرول لپاره لابراتوار فعال کړی دی.
د عمر په خبره؛ په تېر یوه کال کې په هېواد کې دننه ۱۳ د درملو توليد کارخونو فعالیت پيل کړی چي درمل یې په بشپړ ډول د ښه کیفیت درلودونکي دي.
د خوړو او درملو ملې ادارې پرسرست په یو شمیر ډاکټرانو نیوکه وکړه؛ چې د خپلي فیصدۍ د تر لاسه کولو په خاطر له بهرنیو کمپنیو څخه بي کیفیته درمل پیري او پر ناروغانو يې پلوري.
هغه زیاتوي: « زموږ ملامتي بیا دا ده چې زما او ستا ډاکټران لاړ شي او له یوې لوکل کمپنۍ سره قرارداد وکړي، هغه ورته ۴۰ یا ۵۰ سلنه ومني او ډاکټر هم ورته بس همدا درمل لیکي که ښه وي او که خراب؛ بس خلکو ته پنډې وربار کړي، ځکه چې ډاکټر ته یې فیصدي راروانه ده. نن که د افغانستان په بازارونو کې کومې ستونزې د درملو د کیفیت په تړاو لیدل کېږي؛ نو ۷۰ سلنه مجرم په کې خپله ډاکټر دی.»
نوموړی وایي، د تېرې جګړې پرمهال د بهرنیو ځواکونو له لوري په بېلابېلو بهانو په یو شمېر ولایتونو کی کیمیاوي وسلې کارول شوي، چي د انسانانو ترڅنګ یې د حیواناتو او نباتاتو پر روغتیایې وضیعت هم بدې اغېزې کړي.
د عبدالباري عمر په خبره، داسې اسناد لري چې له مخې یې په ځینو ناروغانو کې د یادو وسلو د استعمال اغېزو نښي نښانې ثبت شوي دي.
