د خوړو او درملو ملي ادارې سرپرست ډاکټر عبدالباري عمر نن شنبه د « ۱۴۰۲ کال د زمري پر ۱۴ مه» ملت ته د حساب ورکولو پروګرام کې وویل، نړۍ کې له اکسيجن وروسته، خوراکي توکي او درمل د خلکو اساسي اړتيا ده چې بايد ډېره پاملرنه ورته وشي.
عمر ویلي، د دې ادارې تشکيل له ۲۷۰ څخه ۴۰۰ کسانو ته لوړ شوی او په خبره یې اوسمهال په ټول هېواد کې تشکيل لري.
ډاکټر عبدالباري عمر ویلي، اوس مهال له درملو سربېره د خوړو خوندیتوب ادارې هم په ټول هېواد کې فعالې او بازار ته د بې کيفيته خوړو د واردېدو مخه نيول کېږي.
د عمر په وینا په تېر يوه کال کې یې شااوخوا ۱۰ کارخونو ته د فعالیت جوازونه ورکړي چې يوه بېلګه يې سنو فارما فابريکه ده چې د نړۍ په ۸۰ هېوادونو کې ثبت ده.
دغه راز نوموړي ویلي، په تېر يوه کال کې، د څه د پاسه ۶۵ ميليارده ۲۵۸ ميليونه افغانيو په ارزښت، ۲۱ زره ۴۰۲ قلمه درملو او روغتيايي محصولاتو ته د وارداتو اجازه ورکړل شوې ده.
د یادې ادارې د مالوماتو له مخې،په تېر يوه کال کې، څه د پاسه ۲ زره او ۲۰۰ درمليزو تاسيساتو ته د فعالیت اجازه ورکړل شوې او په همدې موده کې شااوخوا ۳۰۰ ټنه درمل سوځول شوي او ۵۰ ټنه نور يې سوځولو ته چمتو شوي دي.
