د بدخشان احصایې او مالوماتو ریاست تېر کال نږدې ۱۷ میلیونه افغانۍ عواید راټول کړي

د احصایې او مالوماتو ملي ادارې له لوري په خپره شوې خبرپاڼه کې ویل شوي،چې د بدخشان احصایې او مالوماتو ریاست تېر کال ۲۲ زره برېښنايي او شااوخوا ۱۰۴ زره کاغذي پېژندپاڼو له وېش څخه نږدې ۱۷ میلیونه افغانۍ عواید راټول او د دولت خزانې ته سپارلي دي.

یادې ادارې د بدخشان  احصایې او مالوماتو د رییس حافظ حبیب‌الرحمن عثماني له قوله ویلي، چې په ورځني ډول د برېښنايي پېژندپاڼو وېش څانګو ته له ۳۰۰ زیات غوښتونکي د خدمتونو ترلاسه کولو لپاره ورځي.

د عثماني په وینا، د یاد ولایت په مرکز او ټولو ولسوالیو کې اړوند دفترونه فعال دي او تېر کال نږدې ۷ زره او ۳۰۰ کسانو ته په کاغذي پېژندپاڼو کې د اصلاح خدمتونه او له ۹ زرو زیاتو کسانو ته اړوند نور خدمتونه وړاندې کړې دي.