کارپوهان: افغانستان د ترهګرۍ مرکز نه بلکې قرباني دی

د روسیې دفاع وزیر سېرګي شویګو د شانګهای سازمان د دفاع وزیرانو غونډه کې چې د هند کې جوړه شوې وه، اندیښنه ښودلې،چې په سیمه کې د وسله والو ډلو فعالیتونه په پراخیدو دي.

د روسیې دغه لوړي پوځي چارواکي ویلي،په افغانستان کې میشتې وسله والې ډلې منځنۍ اسیا کې د خپل اغیز د زیاتولو په لټه کې دي او ښايي القاعده، داعش ، د ازبکستان اسلامي غورځنګ او د ختیځ ترکستان اسلامي تحریک په څیر ډلې د منځنۍ اسیا هېوادونو ته نفوذ وکړي.

په ورته مهال د شانګهای سازمان د دفاع وزیرانو په ناسته کې هند دفاع وزیر پاکستان ته په اشارې سره ویلي،چې هغه هېوادونه او ادرسونه،چې له ترهګرۍ ملاتړ کوي او روزنه یې پر غاړه لري باید فشار پرې راوستل شي.

خو د سیاسي چارو یو شمېر کارپوهانو په باور افغانستان نه پخوا او نه هم اوس  د ترهګرۍ مرکز دی، بلکې د ترهګرۍ ځالې، روزنځایونه او تجهیز کوونکي ادرسونه مالوم دي او باید پر وړاندې یې اقدام وشي.

دوی وايي، اوس روسیه غواړي،د ترهګرۍ له نومه په استفادې سره په افغانستان کې خپل اهداف ترلاسه کړي.  

د سیاسي چارو کارپوه سرور نیازی وايي:« د مسکو اندیښنه چې ګواکې د تروریزم مرکزونه افغانستان کې دي،دا بې اساسه دي،ځینې هېوادونه د تروریزم له نوم د یوې حربې په شکل استفاده کوي،هغه اهداف چې افغانستان کې لري لاسته یې راوړي، که واقعآ هم دوی له تروریزم د خطر احساس کوي او ورسره مبارزه یې هدف وي، نو د تروریزم  د تربیې او تجهیز ادرسونه مالوم دي او پر هغوی دې فشار واچوي.»

کارپوهان وايي،که روسیه او یاهم یا ګاونډی هېواد په دې تړاو مستند اسناد لري،نو د افغانستان حکومت سره دې شریک کړي او پر وړاندې یې  د مبارزې لپاره دې له اسلامي امارت سره مرسته وکړي،چې اندیښنې ختمې شي .

د سیاسي چارو کارپوه  فهیم جنت وايي:«  د ګاونډیو هېوادونو دغه  اندېښنې بې ځایه دي، په هغه صورت کې چې دوی مشکل لري، له اسلامي امارت سره دې په مستند ډول شریک کړي او اسلامي امارت سره دې همکاري وکړي،چې له ترهګرۍ سره سمه مبارزه وشي او د دوی اندیښنې هم رفع شي.»

ځینې بیا په دې باور دي،چې د روسیې دفاع وزیر دغه څرګندونوې امریکا او نورو غربي سیالانو ته یې متوجه دي،چې ګني روسیې ته د ترهګرۍ ګواښ پيښ دی او په همدې پلمه د مرکزي اسیا په هېوادونو کې خپل پوځونه ځای پرځای کړي.

د سیاسي چارو کارپوه عزیز معارج وايي:« د روسیې دفاع وزیر څرګندونې چې په هند کې یې کړي دي زیاته اشاره یې امریکا او غربي هېوادونو ته ده،مخکې له مخکې ورته وايي چې دلته زموږ لپاره خطر دی او په دې پلمه غواړي،خپل پوځونه د مرکزي اسیا ېته راولي.»

خو اسلامي امارت له وړاندې په ټينګار سره ګاونډیو، سیمې او نړۍ ته ډاډ ورکړی دی،چې چا ته به د دې اجازه ورنه کړي،چې دافغانستان خاوره د نورو پر وړاندې وکاروي او یاهم د نورو پر وړاندې د افغانستان خاوره وکاروي.