د افغانستان لپاره د امریکا ځانګړي استازي توماس وېسټ د دوشبنې پر ورځ د (۱۴۰۲ کال د وري پر ۲۸ مه) په ترکیه کې له یو شمېر افغان سیاسیونو سره کتلي دي.
توماس وېسټ ویلي، په دغو کتنو کې یې له دوی سره افغانستان کې د شته ستونزو په تړاو خبرې کړې دي.
وېسټ پر خپله ټویټر پاڼه لیکلي، د افغانستان په تړاو د خپلې تګلارې په اړه له افغانانو سره سلا مشورو ته دوام ورکوي او په وروستیو کتنو کې یې له افغان سیاستوالو او فعالانو سره د اسلامي امارت د وروستیو پرېکړو په تړاو د هغوی اندېښنې اورېدلي او د نجونو او ښځو د حقونو ، کار او زده کړو په تړاو یې له هغوی سره خبرې کړې دي.
ویسټ ویلي، دوی د سوله ییز حل غوښتونکي وو او په وینا یې تاوتریخوالی نه بلکې خبرې اترې د پرمختګ غوره لار ده.
د امریکا ځانګړي استازي ويلي، افغان سیاستوالو او فعالینو سره خبرو کې یې، افغانانو ته د امریکا پر تلپاتې ژمنتیا او افغانستان کې د بشري بحران حل لپاره له نورو غاړو سره پر کار ټینګار کړی او په وینا یې امریکا د افغانستان د راتلونکې په تړاو د افغانانو د خپلمنځیو خبرو ملاتړ کوي.
وېسټ استانبول ته له سفر وړاندې دوحه کې د افغانستان په تړاو جوړې شوې یوې ناستې کې هم ګډون کړی و او متحده عرب اماراتو کې یې هم له یو شمېر سیاستوالو سره کتلي وو.
