ښوونځیو او پوهنتونونو ته د نجونو پر تګ له بندیز وروسته اسلامي امارت په ملي او نړیوالو غیر دولتي ادارو کې د ښځو په کار هم بندیز لګولی وه، خو له دې بندیز یې د ملګرو ملتونو ښځینه کارکوونکې مستثنا ګرځولې وې.
تازه یې په ننګرهار ولایت کې د ملګرو ملتونو سیمه ییزو ښځینه کارکوونکو ته د اجازې نه ورکولو ته نړیوالو سخت غبرګونونه ښودلي او دا پریکړه یې د عامو افغانانو په لوی زیان بللې.
د ملګرو ملتونو عمومي منشي انټونیو ګوتیریش د اسلامي امارت دا پرېکړه غندلې او ګواښ یې کړی دی،که بېرته وانخېستل شي،افغانستان کې به د دوی مرستې اغیزمنې کړي.
هغه زیاته کړې:« زه د افغانستان په ننګرهار ولایت کې مو د افغان ښځینه همکارانو له کار څخه د منع کولو پریکړه په کلکو ټکو غندم. که چیرې دا پریکړه بېرته وانخېستل شي، نو دا به په جدي ډول د ژوند ژغورنې په برخه کې زموږ د مرستې رسولو وړتیا هغو خلکو ته کمزورې کوي،چې اړتیا ورته لري.»
په ورته وخت کې د افغانستان پر بشري وضعیت د ملګرو ملتونو ځانګړي راپور ورکوونکي ریچارډ بېنېټ د اسلامي امارت دا پریکړه د ښځو حقونو نقض او د ملګرو ملتونو له منشور سره په ټکر کې بللې ده.
هغه زیاته کړې:«د طالبانو لخوا په ملګرو ملتونو کې پر افغان ښځینه کارکوونکو د کار بندیز پریکړه، د دوی له اساسي حقه یوه بله جدي سرغړونه ده،چې د ملګرو ملتونو د منشور خلاف عمل او له امله یې افغانانو ته اړین خدمات اغیزمن کیږي. ښځینه کارکوونکې اړینې دي، نو زه له طالب چارواکو غواړم، چې ژر تر ژره خپله پریکړه بېرته واخلي.»
زلمي خلیل زاد چې تېر کې یې د افغان سولې لپاره د امریکا استازولي کوله، د ملګرو ملتونو په دفترونو کې د ښځینه کارکوونکو په کار بندیز پریکړه یې ناسمه بللې.
خلیل زاد ویلي، اسلامي امارت د دوحې ټولو ناستو کې د ښځو حقونو په تړاو ژمنې کړې او اوس یې باید عملي کړي.
هغه زیاته کړې:« د طالبانو لخوا افغانستان کې د ملګرو ملتونو په دفترونو کې د افغان ښځینه کارکوونکو په کار د بندیز پریکړه ناسمه ده. دا پریکړه به له طالبانو سره د نړیوالو تعامل او اړیکې پیچلې کړي. افغان ښځې د زده کړې او کار په برخه کې نه هېریدونکي حقونه لري،چې دا حقوق په اسلام او نړیوالو قوانینو کې پیژندل شوي دي. طالب مشرانو دوحه کې په عامه او خصوصي ناستو کې د دغو حقونو د درناوي ژمنه کړې، چې دوی باید د افغانانو لپاره پر خپلو ژمنو عمل وکړي.»
اسلامي امارت تازه خپلې وروستۍ پریکړې او نړیوالو غوښتونو ته کوم غبرګون نه دی ښودلی،خو له دې وړاندې یې ویلي ول،چې پر ښځینه کارکوونکو د کار بندیز د افغانانو کورنۍ مساله ده او بهرنیان دې په کې لاسوهنه نه کوي.
