د افغانستان مالیې وزارت وايي، د راتلونکي ۱۴۰۱ مالي کال بودیجې مسوده ترتیب شوې او د راتلونکې یوې اونۍ په موده کې به یې د تصویب لپاره د وزیرانو شورا ته وړاندې کړي.
د یاد وزارت ویاند احمد ولي حقمل وايي، د ۱۴۰۱ مالي کال ټوله بودجه یې له کورنیو عوایدو تمویل کړې او پر بهرنیو مرستو نه ده ولاړه.
حقمل وايي، تمه لري، چې وزیرانو شورا به د روانې مرغومې میاشتې تر پایه د بودیجې مسوده تصویب او د پلي کیدو لپاره به اړوندو ادارو ته وسپارل شي.
حقمل زیاته کړه:« دبودیجې مسوده په وزارت کې اماده ده او تقریبآ کار یې خلاص دی. په تیرو شلو کلونو کې د افغانستان د دولت دا لومړنۍ بودیجه ده،چې پر بهرنیو مرستو تکیه نه ده او ټوله مو د خپلو کورنیو عوایدو پر اساس جوړه کړې ده. له مالیې وزارته یې کار خلاص دې او له دې وروسته به د تصویب لپاره وزیرانو شورا ته ځي او له تصویب وروسته په راتلونکي مالي کال کې د خپلې بودیجې مطابق مخ ته ځو.»
حقمل وايي، دعادي بودیجې د تمویل په برخه کې هېڅ ډول ستونزه نه لري او له خپلو عوایدو یې برابره کړې،خو دپراختیايي بودیجې په برخه کې ځنې ستونزې موجودي دي او په دغه بودیجه کې محدودې پراختیايي پروژې نیول شوي،خو حیاتي دي.
حقمل وايي،که د کال په نیمايي کې عواید لوړ شي،بودیجه کې به تعدیل رامنځته او زیاتې پراختیايي پروژې به په کې ځای پرځای کړي.
هغه زیاتوي:« موږ په عادي بودیجه کې موږ ستونزه نه لرو او عادي بودیجه د خپلو کورنیو عوایدو پوره کوو،خو د راتلونکي کال لپاره مو پراختیايي پروژې هم په نظرکې نیولي دي،خو د تېر پرتله لږې محدودې وي او که د کال په نیمايي کې مو عواید زیات شول،په بودیجه کې به تعدیلات راشي. نورې انکشافي پروژې به هم په کې ځای پر ځای شي .»
خو اقتصادپوهان بیا وايي، بودیجه یوازې د وزارتونو د لګښت پوره کولو په مانا نه ده،بلکې د بودیجې له ترتیب اصلي موخه د هېواد په ګوډ ګوډ کې د پراختیايي پروژو پلي کول او ولس ته د خدماتو وړاندې کول دي.
اقتصاد پوه عبدالقادر جیلاني وايي:« ملي بودیجه په دې مانا نه ده،چې یوازې د اسلامي امارت د وزارتونو او کمېسیونونو مصارف پوره کړي،بلکې خلکو ته باید خدمات عرضه شي،عامه المنفعه او انکشافي پروژې باید د افغانستان په ګوډ ګوډ کې پلې شي.»
په تیرو کلونو کې دافغانستان دهر مالي کال بودجه به څلورنیم سوه ملیارده افغانۍ اټکل کیده چې تر څلویښت سلنه به یې پراختیايي پروژو لپاره ځانګړې شوې وه او هغه مهال به ټوله بودجه په بهرنیو مرسته ولاړه او له اختیاري بودجې به یې کسر زیات و.
