کابل ښاریان:اسلامي امارت دې ژر تر ژره ښوونځي او پوهنتونونه پرانيزي

د کابل ښار یو شمېر اوسېدونکي وايي،تېر دوه کاله په یوه او بله بهانه یې د زده کړو بهير ټکنی شوی او اوس د اسلامي امارت په راتګ د دولتي پوهنتونو دروزاې تړلي دي. 

د دوی په خبره ګڼ شمېر محصلین له بې روزګارۍ او پوهنتونونو تړلو له امله  هېواد پرېښودو ته اړ شوي. 

 د کابل ښار یو تن اوسېدونکی  وايي:« د اسلامي امارت په راتګ سره چې اوس په افغانستان واکمن دی،مخکې د کورونا وبا له امله مکتوبنه او پوهنتونونه رخصت ول او اوس اسلامي امارت بند کړي.هېله مو دا ده،چې ژر تر ژره باید ښوونځي او پوهنتونونونه خلاص شي.»

ځینې نور بيا له بې روزګارۍ او  د بیو له  لوړوالي شکايت کوي او په خبره يې،چې د کار په نه شتون کې په کار وه،چې د اجناسو بيې راټيټي شي،خو په خبره يې هر څه برعکس شوي.

د کابل یو تن اوسېدونکی  وايي:«غريب او بې چاره خلک په ډېرو ستونزو کې لاس او ګريوان دي، د اوړو بيې لوړې شوي، د غوړو بيې لوړې دي، د بورې بيې لوړې شوي، دا خلک يې د اخيستلو توان نه لري.»

شااوخوا دوه ميلونه کسان،چې مخکې يې دندې لرلې،اوس په کور ناست دي او له ګڼو ستونزو کړيږي، ډېری خلک بيا د بې دندو شويو کسانو د غوښتلو خبره کوي،چې بايد پر دندو وګومارل شي.

د کابل ښار یو تن اوسېدونکی وايي:« مخکې چې کوم کسان پر دندو ول، نو هماغه يې د کور نفقه وه، خو اوس چې هغوی بې دندې شوي او په کور ناست دي، نو له ګڼو ستونزو سره مخ دي. له اسلامي امارته مو غوښتنه دا ده،چې بايد دا بې وظيفې خلک ژر تر ژره وغواړي.»

هڅه مو وکړه،د يادو موضوعاتو په تړاو د اسلامي امارت له مسولينو نظر واخلو،خو بريالي نه شو.