د ملګرو ملتونو د کډوالو عالي کمیشنرۍ په یوه راپور کې ویلي،چې روان ۲۰۲۱ زېږدیز کال د جګړو د شدت له امله لسګونه زره افغانان بېځایه شوي دي او بشري مرستو ته اړتیا لري.
راپور کې وړاندې ویل شوي، چې د روان کال له جنورۍ میاشتې راهیسې ۲۷۰ زره کسان له خپلو مېنو بېځایه شوي،چې په دې سره په دغه هېواد کې د بېځایه شوو کسانو شمېره ۳.۵ میلیونه کسانو ته رسېدلی ده.
د کډوالو عالي کمیشنري د خلکو د بېځایه کېدو ستر لامل روانې جګړې بولې او په وینا یې څومره چې جګړې ډېرېږي، دومره د بېځایه شویو کسانو شمېره لوړېږي،چې ورسره جوخت د بشري ناورین ګواښ هم مخ پر لوړېدو دی.
دغې نړیوالې ادارې پر مرستندویه موسسو غږ کړی،چې له بېځایه شویو سره د مرستې لپاره همغږي ډېره کړي او اړمنو ته دې ژر تر ژره بشري مرستې ورسوي.