د سیاسي چارو یو شمېر شنونکي وايي،افغانستان کې د امریکا پوځي ماموریت له پایته رسېدو سره اوس د کابل او واشنګټن ترمنځ د اړیکو نوی فصل پيل شوی او امریکا افغان حکومت ته ډاډ ورکړی،چې د افغان ځواکونو روزنې، مالي ملاتړ ته دوام ورکوي.
د سیاسي چارو شنونکی توریالی ځاځی وايي، ښه ده،چې د کابل او واشنګټن ترمنځ نوي فصل کې پر پاکستان فشار راشي او له دغه هېواد سره مالي مرستې بندې کړای شي.
ځاځي زیاته کړه:« د امریکا اړیکې د نوی فصل په باب ښې نه دي او زما له نظره مثبته ګټه نه لري. د دې لپاره چې امریکا د جګړې پیلیدونکي دي او دا مسولیت هم لري،چې ختمه یې کړي، ولې امریکا نه غواړي. امریکا که د جګړې پای غواړي،نو باید د پاکستان له ملاتړه لاس واخلي.»
په افغانستان کې د امریکايي او ناټو ځواکونو شل کلن پوځي ماموریت چې وسله والو طالبانو سره مخامخ جګړه وه، اوس پاېته رسېدلی او امریکا باور لري،چې خپل هدف یې ترلاسه کړی دی.
د امریکا او طالبانو ترمنځ د دوحې هوکړې له مخې، امریکا نور په ا فغانستان کې وسله والو سره جګړه کې برخه نه اخلي او اوس ټول پوځي عملیات او لارښونه خپله افغان امنیتي ځواکونه پر غاړه لري.
کابل کې د ناټو ځواکونو نوی قوماندان جنرال فرنک مک کنزي وایي، د دوی د ماموریت یو پړاو له پای ته رسېدو سره د ټولې کیسې پای نه ده.
نوي پیلېدونکي فصل کې به څلور مهم ټکي شامل وي، په افغانستان کې د امریکا سفارت خوندیتوب د کابل هوایي ډګر فعال ساتل او افغان امنیتي ځواکونو ته د سلا مشورو لړۍ دوام ترڅنګ ترهګرۍ ضد مبارزه ده.
مک کنزي زیاتوي:« دا د ټولې کیسې پای نه، بلکې د یو فصل پای دی، راتلونکې کې به نوي فصلونه پیل شي. د ناټو او امریکایي ځواکونو په مشرتابه کې دا بدلون زموږ افغان متحدینو ته زموږ د نویو ژمنو ښکارندویي کوي.»
امریکایان له دې وروسته افغانستان د سیمې هېوادونو څخه څاري،خو افغان حکومت ته د متوجې ګواښونو په اړه امریکا لا په کوم پوځي اقدام غور نه دی کړی، په داسې حال کې چې افغان حکومت د طالبانو خلاف همکارۍ ته اړتیا لري.
د سیاسي چارو شنونکی سبحان الله مصباح وايي:« د افغان حکومت او امریکا د اړیکو نوی فصل ځکه سم نه ارزول کېږي،چې طالبان د جنګ په ډګر پیاوړي شوي دي. جنک شدت پیدا کړی دی. افغانان له اقتصادي ستونزو سره مخ شول،نو اوس امریکا ته لازمه ده،چې په دې اړه خپل موقف واضح کړي او په ضمن کې هغه لازمې مرستې چې اړتیا لیدل کېږي،په نظر کې ونیول شي، تر څو دغه ناورین سره چې افغانان مخ دي، خلاصون پیداکړي.»
پر امریکایانو نیوکې دي،چې په بېړه یې افغانستان پرېښی او دا مهال افغان حکومت د طالبانو له داسې ګواښ سره مخ دی، چې کېدای شي،د ولسوالیو له سقوط وروسته ولایتونو ته مخه کړي.
بادغیس او کندهار دوه هغه ولایتونه دي،چې په یوه اوونۍ کې پرې وسله والو طالبانو ډله يیز بریدونه وکړل او ځانونه یې تر مرکزي محبسونو ورسول.