د امریکا دفاع وزیر لوېډ اسټن وايي،د افغانستان روان امنيتي حالت د سياسي حل په موخه نړيوالو فشارونو ته اړتيا ده.
په ورته وخت کې لویډ هېله وښودله،چې د نړۍ هېوادونه په دې برخه کې مرسته کولائ شي.
اسټن زیاته کړه:« د افغانستان امنيتي حالت سياسي حل په موخه نړيوال فشار ته اړتېا ده،چې دا جګړه ختمه شي او افغانانو ته هغه حکومت په لاس ورشي، چې غواړي يې او ارزښت يې لري. ټوله نړۍ کولائ شي، چې په دې برخه کې همکاري وکړي.»
اخوا د سیاسي چارو شنونکی نجیب ازاد وايي، د ملګرو ملتونو له تور نوملړه د درې مياشتو لپاره د طالبانو مشرانو نومونو لرې کېدل، نړيوالو او افغان حکومت سره د دغې ډلې له لوري د راتلونکي حکومت طرحې شریکول، د قطر او ملګرو ملتونو منځګړيتوب د دې ښکارندويي کوي، چې ښايي د افغانستان ستونزه په راتلونکو درې مياشتو کې په يوه معتبر سټيج حل شي.
ازاد زیاته کړه:« له نوملړه د طالبانو مشرانو د درې نورو میاشتو لپاره له بندیزونو اېستل، همدارنګه طالبانو دا ویل، چې په یوه میاشت کې به د سولې یا راتلوونکي حکومت طرحه له افغان حکومت او بهرنیانو سره شریکه کړي. دا بحث او د دې ترڅنګ د امریکا ولسمشر خبرې، چې دوی د افغانستان له حکومت سره خپلو همکاریو ته دوام ورکوي. د دې ترڅنګ بین افغاني مذاکراتو کې د ملګرو ملتونو او د قطر مداخله د منځګړي په توګه، چې هلته لابي وشي او دواړو لورو ته قناعت ورکړل شي، ترڅو یوه معتبره نړیواله ناسته ترسره شي. دا ټول د دې ښکارندويي کوي،چې ښايي په دوه یا درې میاشتو کې د افغانستان قضیه په نړیوال ستیج او یوه معتبره ناسته کې د ملګرو ملتونو تر رهبرۍ لاندې حل شي.»
بل خوا د افغان سولې لپاره د امریکا بهرنیو چارو وزارت ځانګړی استازی زلمی خلیل زاد وايي، په دې باور دی، چې ځينې وختونه د سولې خبرو پر مهال هڅه کېږي، چې دريځ پياوړي کولو په موخه پوځي فشار زيات شي.
خلیل زاد زیاته کړه:« ځینې وختونه هڅه کېږي،چې د روغې جوړې په خبرو کې د دریځ د پیاوړي ښودلو په موخه پوځي فشار زیات شي. زه تعجب نه کوم،چې جګړه خورا سخته شوې، خو زه د طالبانو پرمختګ حیران کړی یم. هیله کوم،چې افغان وسله وال ځواک به د خپلو متحدینو په مرسته دغه پرمختګ پر شاه وتمبوي.»
خليلزاد همدا راز وايي، که طالبان غواړي له پوځي لارې واک ته ورسېږي، نو دا به د دوی هغه ټولې غوښتنې له ګواښ سره مخ کړي، چې له نړيوالو يې لري او نړیوال هر هغه حکومت په رسميت نه پېژني، چې د زور له لارې واک ته رسېږي.