د امریکا ولسمشر جوبایډن ویلي، افغانستان ته یې ځواکونه له ترهګرۍ سره د مبارزې لپاره تللي وو، نه د ملت جوړونې لپاره.
بایډن ويلي، په تېرو شلو کلونو کې يې ميلياردونه ډالر مصرف کړي، د افغانستان حکومت سقوط نه کوي او په وینا یې، د نظام پایښت لپاره ټول لازم ظرفیتونه لري.
د بایډن په خبره، نږدې ۲۵۰۰ سرتېري يې وژل شوي، له شلو زرو زيات ټپيان شوي او زرګونه نور په رواني ناروغيو اخته شوي او نه غواړي، يو بل نسل يې جګړه کې ښکېل شي.
بایډن زیاته کړه:« دا اوس افغانانو پورې اړه لري،چې د خپل هېواد راتلونکې په اړه پرېکړه وکړي. زه به بل امريکايي نسل افغانستان ته د جګړې په موخه ونه لېږم.»
امریکا او متحدین یې باوري دي، چې په افغانستان کې یې شل کلن پوځي ماموریت بریالی و او خپله موخه یې ترلاسه کړې ده.
بایډن ټینګار کړی،چې له تېرو دوو لسېزو لاسته راوړنو او په افغانستان کې د ښځو او نجونو د حقونو ساتنه اوس د افغانستان د حکومت او وسله وال پوځ دنده او مسوولیت دی، خو خپلو خبرو کې یې ډاډ ورکړ، چې افغانستان سره به خپلو مرستو ته دوام ورکوي او خپل ډيپلوماټيک حضور به ساتي.
بایډن زیاته کړه:« زموږ په ناسته کې ما افغان ولسمشر اشرف غني ته ډاډ ورکړ،چې د افغانستان خلکو لپاره به د امريکا ملاتړ دوام وکړي. موږ به د ښځو حقونو په اړه له غږ پورته کولو سر بېره ملکي او بشري مرستو ته هم دوام ورکړو. زه غواړم، افغانستان کې خپل ډيپلوماټيک حضور وساتم او په دې اړه موږ له خپلو نړيوالو شريکانو سره همغږي کوو.»
ولسمشر بايډن دا څرګندونې داسې مهال کوي،چې په کور دننه شااوخوا ۲۶ولایتونو کې د افغان ځوکونو او وسله والو طالبانو ترمنځ جګړو زور اخيستی، د سولې خبرې پر ټپه ولاړې دي او افغانان د خپلې راتلونکې په اړه له يوه نامالوم برخليک سره مخامخ دي.
