د امریکا بهرنیو چارو وزارت خبرداری ورکړی، په افغانستان کې پر زور واک ته رسېدلي حکومت ملاتړ نه کوي، نړیوالې مرستې به دلاسه ورکړي او نه به نړيوالې ټولنې ته مشروعيت ولري.
د امریکا بهرنیو چارو وزارت ویاند نید پرایس وايي:« طالبان يا هر راتلونکی افغان حکومت نړیوالو مرستو ته اړتېا لري، نړيوال مشروعیت ته اړتېا لري، د افغانانو ملاتړ ته اړتېا لري او هر حکومت، چې د وسلې پر زور رامنځته کېږي، د زور له لارې رامنځته کېږي، نو مالومه ده، چې پورته ذکر شوي موارد به له لاسه ورکړي.»
د امريکا دفاع وزارت وياند جان کربي هم وایي، دوی افغانستان کې زيات وخت تېر کړی او د افغان ځواکونو پر روزنه او ظرفيت يې زيات کار کړی او پر هغوی غږ کوي، چې له خپلو خلکو او خاورې دفاع وکړي.
کربي زیاته کړه:« موږ د افغان ملي دفاعي ځواکونو ظرفيت لوړولو په موخه هلته زيات وخت تېر کړی. ډېرې هڅې مو وکړې او ډېرې سرچينې مو وکارولې او اوس د دوی وار دی او د دوی وخت دی، چې له خپلو خلکو دفاع وکړي، له خپلې خاورې ساتنه وکړي او له خپل استقلاليت دفاع وکړي.»
پرايس دا هم وايي، هېواد یې په افغانستان کې روان تاوتریخوالی څاري،چې دا مهال د روانې جګړې کچه تر بل هر وخت لوړه ده او په وینا یې، امریکا په دوامداره توګه د تاوتريخوالي د پايته رسولو غوښتنه کړې.
د امريکا د بهرنيو چارو وزارت وياند نیډ پرایس وايي:« موږ اوس مهال د بین الافغاني خبرو ملاتړ کوو، دا په بشپړه توګه سمه ده، چې سياسي حل د ستونزې يوازنۍ لار ده، چې دوامداره پايله تر لاسه شي او ټول احزاب يې غواړي. ټول په دې پوهېږي، چې سياسي حل د ۴۰ کلنې جګړې حل په موخه يوازنۍ لاره ده.»
امريکايي چارواکي دا خبرې داسې مهال کوي،چې له نږدې يوه کال راهيسې دوحه کې د سولې بین الافغاني خبرې ولاړې دي او د طالبانو مذاکراتي ټیم غړي د جمهوریت مرکچي ډلې سره د خبرو پرځای بهرنیو هېوادونو کې افغان سیاسیونو سره پر خبرو بوخت دي.