کندهار ولایت ته په دغه لوړ پوړي پلاوي کې د ملي دفاع وزارت لوی درستیز، کورنیو چارو سرپرست وزیر او د ملي امنیت لوی رئیس شامل دي.
د یاد لوړ پوړي پلاوي د سفر موخه د دغه ولایت د امنیتي حالت ارزول ښودل شوي دي.
بل پلو دې ولایت ته د لوړ پوړي دولتي پلاوي ورتګ سره سم د اوومې حوزې اړوند سي چپ سیمه کې د صفر شپږ قطعې پر سرتېرو موټربم چاودنه شوې.
د پولیسو ویاند جمال ناصر بارکزی وايي، چاودنه کې یوه کس وژل شوی او د ۹ سرتېرو په ګډون ۲۱ نور ټپيان شوي دي.
د چاودنې مسوولیت تر اوسه پورې کو کومې ډلې پر غاړه نه دی منلی.
د نورو ولایتونو په څیر کندهار کې هم طالبانو د افغان ځواکونو پر ضد جګړې ته شدت ورکړی، تر دې دمه یې اوه ولسوالۍ نیولي او د جګړې لومړی کمربند د ښار تر دروازو رسېدلی دی.
د کندهار شاه ولیکوټ، ارغستان، پنجوايي، نېش، میانشین، میوند او معروف هغه ولسوالۍ دي، چې په ورستیو دوو اوونیو کې یو په بل پسې طالبانو نیولې دي.
