په هېواد کې د کورونا وبا د درېیمې څپې له پیل او د جګړې ډېریدو سره هم مهاله په بازارونو کې د توکو بیې څو برابره لوړې شوي دي.
عام خلک پر سوداګرو له دې امله نیوکې کوي،چې ذ ناامنۍ، لارو بندېدو او کورونا وبا پرمهال پر خپل سر بیې لوړوي او پر مسوولو ادارو یې نیوکې دا دي،چې په بازار کنټرول نه لري.
د کابل ښار یو تن اوسېدونکی وايي:« که موږ وګورو، له یوې خوا کورونا وبا او له بلې خوا جګړې دي، چې د خوراکي توکو بیې ورسره لوړې شوي دي. دغه راز د سون توکو بیې هم لوړې شوي دي. متاسفانه خلک غریب دي او وس نه لري، چې توکي واخلي، ځکه که موږ وګورو، د یوه مامور تنخوا ۶ زره یا ۷زره افغانۍ ده، نو دا پر دې پیسو څه واخلي.»
د ولسي جرګې یو شمېر غړو هم پر سوداګرو نیوکې کړي، چې له روان حالته استفادې سره د توکو بیې لوړوي.
د ولسي جرګې غړی شاه وزیر ترخېل نیوکه کوي،چې حکومت او ښاروالۍ پر سوداګرو فشار نه رواړي او په خبره یې بازار کې پر سوداګرو کنټرول نه لري.
ترخېل زیاته کړه:« حکومت په داسې یوه حالت کې دی، چې ځان ټول خپل ګڼي. وايي، همدا زه چې څه وایم او په ځانګړي ډول د حکومت په راس کې چې څو کسان دي. دوی په دې تمه دي،چې همدا موږ چې څه وایو، همدا خپله موږ قانون یو. »
د ولسي جرګې غړی شاه پور حسنزی وايي: « په افغانستان کې چې د ناامنۍ کومه لړۍ پیل شوې، د ولسوالیو سقوط، نو دې کې تجاران او حکومت دواړه خپلې ګټې لټوي. همدا لامل دی،چې نن سبا بیې لوړې روانې دي. تاسې ګورئ،چې د افغانستان پیسې هم د ډالرو پر وړاندې راپرېوتې.»
کورونا وبا، جګړه، نا امني او بې وزلي هغه څه دي،چې د عامو خلکو ژوند یې ننګولی، د فقر او وزګارتیا کچه یې لوړه کړې او ورځ تر بلې په بازارونو کې د توکو نرخونه پر لوړېدو دي.
