د طالب ویاند قاري یوسف احمدي له ادرسه په لېږل شوو مالوماتو کې ادعا شوې، چې د پنجوايي ولسوالۍ مرکز او ټولې دولتي ودانۍ یې نیولي.
قاري یوسف احمدي ویلي، یو شمېر حکومتي ځواکونو ته په کې مرګ ژوبله اوښتې او یو شمېر نورو یې سیمه پرېیښې او تللي دي.
حکومتي مسوولین په دې اړه څه نه وايي.
په پنجوايي ولسوالۍ کې له تېرو څلورو ورځو راهیسې سخته جګړه روانه وه او امنیه قوماندانۍ یې محاصره وه.
هلته کلابند امنیتي سرتېرو ادعا کړې وه، چې د ملي اردو ځواکونو له هر ډول مقاومت پرته خپل ټول مرکزونه طالبانو ته پرېيښي او له دوی سره یې مرسته نه ده کړې.
دوی دغه راز وايي، د هوایي ځواکونو د مرستې پرلپسې غوښتنې یې هم نه دي منل شوي.
دا په تېرو ۲ اونیو کې د کندهار پنځمه ولسوالۍ ده، چې طالبان یې نیسي.
تر دې وړاندې، میوند، خاکرېز، غورک او شاه ولیکوټ ولسوالیو سقوط کړی وو.