د امریکا ولسمشر جو بایډن وايي، افغان مشران د حکومت ثبات ساتلو وړتیا لري، خو په خبره یې د افغانستان کورنیو مسایلو په اړه اندېښمن دی.
د بایډن لپاره د اندېښنې ټکی د افغانانو ترمنځ خپل منځۍ شخړې او مسایل وو،چې په وینا یي پر ملي کچه ملاتړ ته اړتیا لري.
بایډن زیاته کړه:« وګورئ، موږ په هغې جګړه کې د شلو کالو لپاره وو. زه فکر کوم، ما لومړی ځل ماڼۍ کې له افغان چارواکو سره وليدل. زه فکر کوم،د حکومت د ثبات لپاره هغوی وړتيا لري، زه تصور کوم، چې نور مذاکرات به هم وشي،خو زما اندېښنه دا ده،چې دوی داخلي مسایل لري او د حکومت د بقاء لپاره دوی په ملي کچه ملاتړ ته اړتیا لري.»
بایډن چې له افغانستان څخه یې د امریکایي ځواکونو د وتلو پرېکړه کړې وایي، دا بهیر به په نږدې ورځو کې بشپړ نه شي.
اوس د بهرنیو ځواکونو له وتلو سره طالبانو په ډېر شمېر ولسوالیو ولکه ټینګه کړې ده چې د ولسمشر غني په مشرۍ حکومت یې ننګولی دی.
بل پلو د سیاسي چارو یو شمېر تحلیل کوونکي د جو بایډن د دې خبرو په اړه چې په ملي کچه ملاتړ افغانانو ته پکار دی اندېښمن دي،چې ولسمشر په ملي کچه داسې سیاسي اراده رامنځ ته نه کړای شوه،چې له مخې یې یوه قوي اجماع راشي.
د سیاسي چارو تحلیل کوونکی سبحان الله مصباح وايي:« د ولسمشر غني سیاست د هغو مرورو سیاسیونو چې له ده سره یو ځای نه دي، له سره تر اخره سم نه وو. هغه سیاسي اراده چې ټولو قناعت ورکړي، په خواشینۍ سره باید ووایو، چې تر اوسه پورې یې شتون نه درلود. »
ولسمشر غني له سیاسي جریانونو سره وخت په وخت ناستې کړي دي، خو سم لاسي یې پایله نه شته،چې وښیي د جګړې او سولې په برخه کې سیاسیون د حکومت په څنګ کې ولاړ دي او که نه؟ ارګ په دې اړه پوښتنې ته ځواب ورنه کړ.
