پنجوايي ولسوالي کې له تېرو ۳ ورځو راهیسې درنه جګړه روانه ده، طالبانو یې ګڼې سيمې نيولي، اوس د ولسوالۍ او امنیه قوماندانۍ ودانۍ طالبانو تر سختې جګړې وروسته محاصره کړي دي.
هلته محاصره سرتېري وايي، په دغه ولسوالۍ کې د ملي اردو ځواکونو له هر ډول مقاومت پرته خپل لوی کمپ او ټولې امنیتي پوستې طالبانو ته پرېيښي او د دوی مرسته یې نه ده کړې.
سرتېري د ملي اردو پر قوماندانانو نیوکه کوي، چې طالبانو ته يې پر مختللي وسلې، ټانکونه او نور مهمات پرېيښي او اوس طالبان په هماغه وسلو له دوی سره جګړه کوي.
د دغو محاصره پولیس سرتېرو د یادې نيوکې په اړه د ۲۰۵ اتل قول اردو مسوولین له څه ویلو ډډه کوي.
پنجوايي ولسوالۍ د کندهار یوه تر ټولو امن ولسوالۍ وه، چې شنو باغونو او تازه مېوو یې د کندهار ښار تر څنګ د نورو ولایتونو د اوسېدونکو لپاره هم یو غوره تفریح ځای ګڼل کېده.