د ملي امنیت ځانګړي ځواکونه وايي چې په ننګرهار ولایت کې یې د انسان تښتوونکو هغه پنځه کسیز ډله نېولې چې شاوخوا یوه نیمه میاشت وړاندې یې یو څلور کلن ماشوم تښتولی و، چې بیا یې ۲۰۰ زره پاکستاني کلدارو په بدل کې خپلې کورنۍ ته سپارلی و.
نیول شوي کسان نظر ګل، نجیب الرحمن، عطاءالرحمن، رغزي ګل او اکرم نومیږي چې د ملي امنیت منسوبینو له لورې په جلال آباد ښار، شینوارو، لعلپورې او مومندرې ولسوالیو کې نیول شوي او پخپلو جرمونو یې اعتراف هم کړی دی.
