افغان حکومت د امریکا پر ځای چین ته لاس اوږد کړی او د افغان ځواکونو د ملاتړ مرسته یې ترې غوښتې.
د بهرنیو چارو وزارت ویلي، چین د افغان ځواکونو د ملاتړ په اړه مثبت ځواب ورکړی.
د بهرنیو چارو وزیر حنیف اتمر ویلي، د چین د بهرنیو چارو له وزیر، وانګ یي سره یې له ترهګرۍ سره د ګډې مبارزې په اړه خبرې کړې او بیجنګ د دې موخې لپاره د افغان ځواکونو د ملاتړ په اړه مثبت ځواب ورکړی.
حنیف اتمر ویلي، د ترهګرۍ مخنیوی د افغانستان او چین ګډ هدف دی او د چین خپلې ګټې هم په دې کې خوندي دي.
اتمر دا نه دي ویلي چې چین به کله او څنګه د افغان ځواکونو ملاتړ کوي، خو زیاته کړې یې ده چې د چین دا دریځ د کوم لوی جیو پولیټیک بدلون په معنا نه دی.
له بل لوري د ملي امنیت شورا سلاکار، حمدالله محب هم د چین د بهرنیو چارو وزیر سره په ټیلیفوني خبرو کې بیا سولې ته د طالبانو د غاړې اېښودو په موخه پر طالبانو د ملګرو ملتونو د بندیزونو په ګډون د هر ډول فشار راوړلو غوښتنه کړې ده.
