ولسمشر محمد اشرف غني له بهرنیو رسنیو سره په خپله تازه مرکه کې یو ځل بیا ټینګار کړی چې د هېواد راتلونکی نظام پر ټاکنو ولاړ دی او ټاکنې اساسي کرښه ده.
نوموړي په دغه مرکه کې د جګړو د شدت له امله خپله اندېښنه پټه نه کړه، خو وايي، له میاشتو یې دا ډول حالت ته چمتووالی درلود.
ولسمشر غني د کندهار ارغنداب ولسوالۍ یادونه وکړه او وې ویل: طالبانو یې د نیولو پلان درلود، خو دوی یواځې د ویجاړوونکي ځواک په ډول بریدونه وکړل او د خلکو له توندو احساساتو سره مخ شول.
ولسمشر غني وویل: ((طالبان سیمې نه شي نیولی، دوی یواځې ځورونکي بریدونه کوي. دا یوه ویجاړوونکې قوه ده. دوی خاوره نه شي ساتلی. ارغنداب په کندهار کې یواځینۍ ولسوالۍ وه چې دوی یې د نیولو هڅه کړې وه او خلک ور سره اوس په پوره احساس نفرت کوي.))
وروسته له هغې چې د امریکايي سرتیرو وتل پیل شول، ورسره جګړو او بریدونو هم زور واخیست، خو ولسمشر محمد اشرف غني د نورو خلاف وايي، د بهرنیو سرتیرو وتلو پرېکړه ستراتیژیکه ده، دا وتل به جګړه اسانه او هر څه به روښانه کړي.
په دغه مرکه کې ولسمشر د سیمې هغو هېوادونو اندېښنو ته په اشارې چې افغانستان کې یې د امریکايي سرتیرو له حضور درلودې، ویلي، نور باید یو ځای کار وکړو څو ګډ خوندیتوب ته ورسیږو.
ښاغلي غني وویل: ((سیمه اوس پوهېږي چې امریکا په افغانستان کې د اوږدې مودې له پاره د پاتې کېدو نیت نه لري. نو موږ باید سره یو ځای شو تر څو یوې ټولیزي امنیتي ستراتیژۍ ته ورسېږو.))
ولسمشر د جمهوریت پر بقا ټینګار وکړ او وې ویل، د افغانستان راتلونکی سیسټم پر ټاکنو ولاړ دی، او له ټاکنو انکار ډیرې پوښتنې پیدا کولی شي.
ولسمشر په دې تړاو وویل: ((طالبان باید ومني چې د افغانستان راتلونکی سیاسي سیستم باید په ټاکنو ولاړ وي. دا اساسي کرښه ده. نورې خبرې د بحث وړ دي. که دا اساسي غوښتنه نه منل کېږي بیا د حقونو پوښتنه او په تېرو شلو کلونو کې زموږ د لاس ته راوړنې چې ځانګړې برخه یې د مېرمنو، ځوانانو، اقلیتونو او د ژوند په ټولو برخو کې دي، ټولې تر پوښتنې لاندې راځي.))
ولسمشر غني د زور له لارې د طالبانو راتګ ته په اشارې وايي، غواړي د خپل هېواد لپاره مړ شي خو د جګړو د دوام په صورت کې خپل خلک او امنیتي ځواکونه یوازې نه پرینږدي.
ولسمشر غني وایي: ((که جنګ دوام پیدا کوي، زه اعلی سر قومندان یم. زه به خپل خلک پرېنږدم، زه به خپل ځواکونه هم پرېنږدم، زه غواړم چې د خپل هېواد لپاره مړ شم. زه په واک کې د پاتې کېدو سره لېوالتیا نه لرم. زه د نظم راوستلو ته ژمن یم. افغان ټولنه نظم غواړي.))
ولسمشر غني د مرکې په پای کې وویل: ((اړ یم ګواښونه ومنم او د ژوند تر ورستیو شېبو د خپل ولس د هوساینې لپاره کار وکړم، دا تاریخ دی چې قضاوت به کوي.))
