افغان سولې لپاره د امریکا او ځینو نورو ادرسونو هڅې تر بل هر وخت زیاتې شوې دي، چې په دې لړ کې پټ سفرونه هم شوي.
سرچینې وایي، د افغان سولې لپاره د امریکا ځانګړی استازی زلمی خلیلزاد د ترکیې ناستې د ترسره کېدو په تړاو درې ورځو وړاندې په پټ سفر کابل ته راغلی و، چې یوازې یې له ولسمشر غني او عبدالله عبدالله سره کتلي دي.
ولسمشرۍ ماڼۍ او د مصالحې عالي شورا د خلیلزاد سره د لیدنو په تړاو رسمي څه نه وايي او نه هم د دې لیدنې جزییات خپاره شوي، خو شمشاد ته یوه سرچینه مني چې خلیلزاد، ولسمشر غني او عبدالله عبدالله ته یو لیک سپارلی دی.
په ورته وخت کې، دا مهال ټول ښکېل اړخونه د ترکیې ناستې د ترسره کېدو لپاره په خپلو طرحو بوخت دي، خو یو لوری هم د دې ناستې دقیق وخت نه تاییدوي.
یوه بله سرچینه بیا وايي، طالبانو تر اوسه د ترکیې ناسته کې د ګډون لپاره تیاری نه دی ښودلی او له مخکې یې د ځینو لویو مسایلو په تړاو د ضمانت غوښتنه کړې ده.
د سرچینې په خبره، طالبان غواړي چې د دوحې هوکړه په ټاکلې موده کې بشپړه عملي شي او طالبان دغه راز غواړي چې د ترکیې لومړنۍ ناسته باید برخلیک ټاکونکې وي.
یاده سرچینه وایي: ((طالبان تر مې میاشتې د دوحې هوکړې بشپړ عملي کول غواړي. د خپلو ټولو بندیانو خلاصون او د ټولو بهرنیو ځواکونو وتل غواړي. د طالبانو ټینګار په دې دی چې د انقرې لومړنی ناسته برخلیک ټاکونکې وي یعنې په دې ناسته پسې نورې ناستې نه مني.))
امریکا داسې مهال خپلې هڅې کړندۍ کړي، چې د دوحې هوکړې د عمل مودې لپاره لږ تر لږه دوه میاشتې وخت پاتې دی.
