نیمروز کې د کمال خان اوبو بند چې ۷ سوه کاله وړاندې یې افغانانو د جوړېدو تکل کړی و، په کال ۱۳۴۵ کې پرې کار پيل شو، خو د کورنیو جګړو له امله یې د جوړېدو کار پاتې شو او بالاخره د ولسمشر غني په حکومت کې د ۱۱۱ میلیونه ډالرو په لګښت جوړ او نن ګټې اخیستې ته وړاندې شو.
ولسمشر محمد اشرف غني د بند پرانیستې مراسمو کې وویل، د اوبو د مدیریت لپاره کلک هوډ لري او له دې وروسته به د افغانستان اوبه ګاونډیو ته په وړتیا توګه نه ورتوییږي.
په یادو مراسمو کې ولسمشر غني دغه راز وویل، که ایران اوبو ته اړتیا لري، نو په بدل کې دې افغانستان ته تېل ورکړي.
ولسمشر غني وویل: ((د افغانستان او ایران اقتصاد د یوه بل متمم دي، خپلې اوبه چاته وړیا نه ورکوو، د نیمروز خلک دې خپل پیداوار په ویاړ سره وپلوري. د ملي ګټو په برخه کې شاتګ نه کوو او په دې لار کې آن خپل سر هم قربانوو.))
ولسمشر غني په خپلو خبرو کې دا هم وویل: لکه څنګه چې د کمال خان بند په جوړولو سره مهاجر مرغان بېرته هېواد ته راستانه شول، هیله لرو چې ټول افغان کډوال هم بېرته خپلو کورونو ته راستانه شي.
ولسمشر همداشان روان جنګ د افغانستان د پرمختګ پر وړاندې لوی خنډ یاد کړ او وې ویل، تېر کال وسله والو د یو میلیارد ډالرو په ارزښت د افغانستان بنسټونه نړولي چې له دې سره یې د کمال خان بند په څېر پر لسو نورو سترو پروژو د کار مخه ونیوله.
ولسمشر غني دا هم وویل چې د قیامت په ورځ به یې د کمال خان بند اوبه شفاعت وکړي.
ولسمشر غني د پرانیستې په مراسمو کې کمال خان بند ته څېرمه د ځمکو وېشلو کې به د هغو کسانو کورنیو ته چې د دغه بند په ساتنه کې یې قرباني ورکړې او هغو کورنیو چې د بند په جوړولو کې یې خپل جایدادونه له لاسه ورکړي، لومړیتوب ورکړي.
د کمال خان بند د ۱۶ میترو په لوړوالي کې جوړشوی، چې ۵۲ میلیونه میترمکعب اوبه ذخیره کوي، ۱۷۴ زره هکتاره ځمکه خړوبوي، د ۹ میګاواټه برېښنا د تولید وړتیا لري او همدا راز له ۶۵۰ زرو زیاتو خلکو ته د کار زمینه برابرولی شي.
د دغه بند د مخنیوي لپاره تر دې دمه ۳۵ لوی او واړه بریدونه شوي، ۳۹ سرتیرو ته مرګ ژوبله اوښتې او ۲۸ سرتیري لا هم د وسله والو له لوري بندیان دي، خو د نیمروز ولسونو ژمنه وکړه چې د کمال خان بند امنیت به خپله ساتي.
