افغان حکومت هیله لري چې د ایران او امریکا کړکېچ به افغان سوله زیانمنه نه کړي.
د افغانستان په اړه په سیمه ییزو سیاستونو کې ښکاره بدلون همدا و چې د سیمې او ګاونډیو هېوادونو د افغان حکومت له وسلوالو مخالفینو سره اړیکې علني کړي او خپلو هېوادونو کې يې مېلمانه کړل.
اوس چې له ایران سره د امریکا پوځي ټکر راغلی د امریکا تمه له طالبانو دا ده چې دې هېواد سره اړیکې پرې کړي.
دا د پردې ترشا یوه غوښتنه ده چې طالبانو او امریکا یې د کره والي په اړه کوم غبرګون نه دی ښوولی.
شنونکی شهزاده مسعود داسې وویل (( امریکا خو له کلونو را پدېخوا ایران سره په تقابل کې ده، او همدا راز د سیمې نورو هېوادونو لکه روسیې سره په تقابل کې دي خو افغانستان یو خپلواک او ازاد هېواد دی او نباید د نورو هېوادونو د سیالۍ قرباني شي بلکې د هېوادونو ترمنځ د همکارۍ په مرکز ترې استفاده وشي.))
د امریکا او ایران په شخړه کې له هر لوري افغانستان ته تاوان شته سره له دې چې افغان حکومت په دې مسله کې بې طرفه دی او د خپلې خاورې ډاډ یې ورکړی چې د چا پرضد به استعمال نه شي.
خو له طالبانو یوه داسې تمه چې ایران سره اړیکې پرې کړي دا لاسوهنه د سولې امکان کمزوری کوي.
شنونکی عبدالباري عارض داسې وايي (( د قطر د خبرو ځنډ یو لامل هم همدا دی، چې امریکا غوښتل هغه څه چې په جګړه کې یې ترلاسه کړي ترلاسه یې نشو کړای اوس غواړي چې د سولې خبرو کې یې ترلاسه کړي. ))
د امریکا د بهرنیو چارو وزارت هم ایران سره د شخړې پرمهال وویل چې دغه هېواد له سیمه ییزې اجماع وتلی دی او ایران کار پیل کړی چې د افغان سولې پړ وړاندې خنډونه جوړ کړي.
افغان سوله چې سیمه ییز او نړیوال ملاتړ ته اړتیا لري افغان حکومت وایي، د امریکا او ایران کړکېچ نه باید د سولې پروسه وګواښي.
د ولسمشر ویاند صدیق صدیقي داسې وویل (( موږ تمه لرو چې د امریکا او ایران ترمنځ وروستي کړکیچونه او لانجې د افغانستان سولې پروسې باندې اغیز ونه کړي.))
افغان حکومت له ایران سره هم نږدې دی او د ایراني جنرال په وژنه یې خواشیني ښودلې ده.
