طالبان له هوکړې وروسته د اوربند په تړاو پرېکړه کوي.
طالبانو په روښانو ټکو د اوربند موضوع رد کړې خو د تاوتریخوالي د کمېدو په تړاو یې د مشورو د سلسلې د دوام خبره کړې.
دا واضح نه ده چې د تاوتریخوالي د کمېدو اصلي معنی څه کېدای شي؟
د خلاصون لارې شورا مشر اکبر آغا داسې وویل (( طالبانو په به اخترونو کې نا اعلان شوی اوربند کاوه تاوتریخوالی به نه نه و بریدونه به نه کېدل خو دا اوربند به د یوې هوکړې په اساس نه کیده او غیر رسمي به و، اوس هم داسې ښکاري چې دا ځل هم همداسې وشي اوربند به نه وي اعلان شوی خو مانا به یې اوربند وي.))
امریکا تر اوسه له طالبانو سره د اوربند په تړاو په رسمي ډول څه نه دي ویلي خو افغان حکومت ویلي اوربند او د تاوتریخوالي کمېدل د دوی محوري غوښتنه ده.
د سولې په چارو کې د دولت وزارت وايي، اوربند د تاوتریخوالي کمښت ته لار هواروي.
د سولې په چارو کې د دولت وزارت ویانده ناجیه انوري داسې وايي (( اوربند د تاوتریخوالي د کمېدو لامل کیږي، زموږ د ټولو غوښتنه دا ده چې تاوتریخوالی دې کم شي او دا هله شونې ده چې اوربند اعلان شي.))
اوربند او د تاوتریخوالي کموالي، د باور جوړونې او د سولې خبرو د بریا لپاره اساسي شرایط ښکاري چې د جګړې ښکېل اړخونه پرې په مشورو بوخت دي.
د ولسي جرګې غړي په لومړي سر کې اوربند مهم ګڼي خو وايي، د تاوتریخوالي کمښت هم اصلي هدف ته ګامونه لنډولی شي.
د طالبانو له اعلامیې دا برداشت کيدای شي چې ممکن دوی په خپلو کې کومې هوکړې ته رسیدلې وي. بله خوا د خلیلزاد له لورې تازه د طالبانو د نظر په اړه کوم غبرګون نه دی ښودل شوی، خو افغان حکومت ویلي کله چې طالبان او امریکایان هوکړه وکړي دوی به خپل جوړ شوی پلاوی رسنیز کړي.
