د قطر په پلازمېنې دوحه کې امریکا او طالبانو پټې خبرې دوام لري.
رسمي ادرسونه په دې اړه له څه ویلو ډډه کوي خو باور کېږي چې خبرې د دې لپاره پټې ساتل کېږي چې پایلې یې زیانمنې نه شي.
امریکا او طالبانو خبرې په هغو جنجالي مسایلو روانې دي چې په تېر کې پرې لس پړاوه خبرې شوې.
د طالبانو ښکاره دریځ همدا دی چې امریکا سره به خبرې له درېدلي وضیعت پیلوي او نوې خبرې نه شته.
د امریکا او طالبانو د بیاځلي خبرو پرده امریکایي ولسمشر افغانستان کې پورته کړه چې طالبانو سره یې د سولې هوکړه لغوه کړې وه.
اوس د دواړو لورو ترمنځ د خبرو یو پټ جریان روان دی چې د خبراوي سرچینې په دې خبرو غلې دي.
تېرځل د هر پړاو خبرو ځینې د بحث وړ مسایل به یې رسنیز کېدل، خو داځل هرڅه پټ ساتل شوي دي.
د سولې عالي شورا غړي قاضي محمد امین وقاد داسې وویل (( دا مذاکرات ملي او بین المللي حمایت لري بالاخره به امریکایانو سره مذاکرات یوې پاېلې ته رسیږي او بیا به افغان حکومت سره بین الافغاني مذاکرات پيلیږي.))
په دوحه کې د امریکا او طالبانو په پټو خبرو کې د بحث وړ مسایل پخواني دي چې امریکایي ځواکونه په څه ډول بهر شي او طالبان څنګه کولای شي افغانستان کې د وسلوالو ډلو د ګواښ په اړه امریکا ډاډه کړي.
بین الافغاني خبرې او اوربند چې د افغان حکومت او امریکا مشترکه غوښتنه ده لاهم په اجنډا کې نه دي شامل شوي.
د بهرنیو چارو وزارت ویاند ګران هېواد داسې وویل (( رسمي اطلاعات تر اوسه په دې هکله نه شته د افغانستان دولت د سولې په هکله واضیح دریځ لري او د دریځ په اول سره کې اوربند او بیا د بین الافغاني مذاکراتو پیل دی.))
اوس چې د خبرو تسلسل پټ ساتل کېږي او افغان دولت له خبرو بې خبره دی پایلو ته یې چندان هیله نه شته خو غوښتنه داده که خبرې له ولس پټې ساتل کېږي حکومت باید پرې خبروي.
داسې ښکاري چې د امریکا او طالبانو پټو خبرو د چین په ناسته سر له اوسه اغیز کړی چې دا ناسته ځنډېدلې ده.
امریکا له دې اندېښنه لري چې افغان سوله نه باید د دوی رقیبو هېوادونو لاس ته وغورځېږي.
