د امریکا ولسمشر ډونالډ ټرمپ ویلي، طالبان هیڅ وخت دومره سخت نه وو ځپل شوي لکه په دې وروستیو کې چې نظامي فشارونه ور باندې زیات شوي دي.
ټرمپ په ورته وخت کې ویلي، طالبانو سره د سولې خبرو لپاره نورې لارې هم شته خو دا چې دغه لارې کومې دي په اړه یې ډیر جزیات نه دي ورکړي.
د امریکا ولسمشر ډونالډ ټرمپ طالبانو سره د نهه میاشتو خبرې اترې وروسته له هغې ودرولې چې د کابل په شش درک سیمه کې ځانمرګي برید په مهال بهرنیان په نښه کړل.
د سولې خبرو له دریدو وروسته طالب پلاوی مسکو ته تللی او غواړي وروسته له هغې پاکستان او چین ته لاړ شي.
له دې سره ناټو وايي، له افغانستان د ځواکونو د ایستلو په اړه هېڅ راز بحث نه دی شوی.
د ناټو لوړپوړی امریکايی قومندان جنرال ټاډ ولټرز وايي، ناټو د افغان ځواکونو ملاتړ ته ادامه ورکوي او له دغه هېواد د سرتېرو دایستلو په اړه هېڅ راز بحث نه دی شوی.
دده په خبره ناټو د افغانستان امنیت ته ژمنه ده او په دغه هېواد کې به د ترهګرۍ ضد جګړې ته ادامه ورکوي.
جنرال ټاډ وايي په افغانستان کې ددوی په ماموریت کې هېڅ راز بدلون نه دی راغلی او په دې اړه د ناټو شریکو هېوادونو ته ډاډ ورکوي.
جنرال ټاډ ویلي په افغانستان کې ولسمشریزې ټاکنې ترسره کېږي او دوی ددغه ټاکنو ترسره کولو ته بشپړه تیاري لري څو وکړی شي د امنیت په تامین کې له افغان ځواکونو سره خپله همکاري وکړي.
ټاډ ټینګار کړی چې دوی په افغانستان کې د ترهګرو ځپلو ته ژمن دي او ددغه ډلو پر وړاندې به په افغانستان کې د ناټو جګړه دوام لري.
