د ننګرهار په خوږیاڼو ولسوالۍ کې بزګرانو د بنګو بدیل پیدا کړی دی.
هلته اوس امنیت تر یو بریده برابر شوی او بزګران وایي، په خپلو ځمکو یې د بنګو پر ځای کرم کرلي چې له حاصلاتو یې خوښ دي.
بزګران وایي، تر بنګو ورته کرم ډېرې پېسې ګټي او کولی شي له دې لارې خپل اقتصاد ښه کړي؛ خو ګیله کوي چې ولایتي چارواکي ورسره همکاري نه کوي.
کرنې ریاست بیا د بزګرانو نیوکو ته ځواب نه لري.
د یادې ولسوالۍ بزګران وایي، هغه مهال چې په دې سیمو کې طالبانو وو، بزګرانو په خپلو ځمکو بنګ او کوکنار کرل؛ خو اوس چې امنیت نسبي ښه شوی بزګرانو په خپلو ځمکو د نشه یي توکو پر ځای کرم کرلي دي چې حاصلات یې ښه دي.
بزګر بیت الله داسې وویل (( دا کرم له کوکنارو او بنګو څو برابره ښه دي، حاصلات یې کولی شي زمونږ اقتصاد ښه کړي خو که دولت زموږ سره مرستې وکړي او ښه بازار راته جوړ کړي دې کار ته به ټول خلک مخه کړي))
حمید الله چې په کرونده کې په کار بوخت دی وایي، پښېمانه دی چې پخوا یې پرخپلو ځمکو نشه یې توکي کرل.
دی وایي، تر بنګو کرم ښه حاصل ورکوي.
حمید الله وویل (( کرم تر کوکنارو او بنګو ښه حاصل ورکوي ګټه یې زیاته او حلاله ده، موږ خوښ یو چې اوس د کوکنارو پر ځای کرم کروو او حاصل یې اخلو.))
بزګران وایي، اوس خوشاله دي چې سیمې یې له وسله والو ډلو پاکې شوي دي او له وېرې پرته ژوند یې بیا پیل کړی.
دلته بزګران بیا له چارواکو ګیله لري چې ورته په وخت سرې او تخمونه نه ورکول کېږي.
دوی غوښتنه کوي چې د اقتصادي ودې لپاره دې کرنې ریاست او نور مسؤول چارواکي له بزګرانو سره همکاري وکړي.
د بزګرانو ستونزو او نیوکو په تړاو مو د کرنې ریاست چارواکو ته څو ورځې انتظار وکړ؛ خو ځانونه یې بوخت ښودل او نظر مو تر لاسه نه کړ.
خوږیاڼي د ننګرهار هغه ولسوالۍ ده چې تردې وړاندې بزګرانو په خپلو ځمکو په ډېره پېمانه نشه یې توکي کرل او بیا دې ځای نورو سیمو ته لېږدول کېدل.
