د امریکا بهرنیو چارو وزیر مایک پومپیو ويلي، ولسمشر ډونلډ ټرمپ غواړي، له ۲۰۲۰ کال مخکې چې شاوخوا پنځه میاشتې ورته پاتې دي، له افغانستانه د ځواکونو ایستل پیل کړي.
پومپیو ویلي، ټرمپ د امریکا له ولسمشریزو ټاکنو وړاندې له افغانستانه د پوځیانو ایستل پیلوي او په وینا یې ده ته یې همداسې لارښوونه کړې ده.
هغه ویلي، نه یوازې له طالبانو سره خبرې شوې، بلکې د ولسمشر غني په ګډون له نورو افغانانو سیاستوالو او مدني فعالانو سره هم په اړیکه کې دی او په وینا یې د سولې او ځواکونو وتلو خبرو کې پرمختګ شوی.
تر دې دمخه ښاغلي پومپیو په کابل کې ویلي و چې هڅه کوي د سپټمبر میاشتې دمخه له طالبانو سره د سولې هوکړې ته ورسېږي.
په ۲۰۱۶ کال کې د امریکا له ولسمشریزو ټاکنو مخکې ښاغلي ټرمپ هوډ څرګند کړی و، چې له افغانستانه به امریکايي ځواکونه باسي.
له دې سره ده هیل ورځپاڼې د یو تقاعد شوي امریکایي جنرال ډېنل مورګان له قوله لیکلي، امریکا باید په افغانستان کې خپله اوږده جګړه ختمه کړي.
ډېنل مورګان ویلي، افغانستان کې پر روانه بې مانا جګړه په میلیاردونو ډالر لګېدلي چې امریکا ته یې هېڅ ګټه نه ده کړې او په وینا یې نور باید په افغانستان کې یو امریکایي عسکر هم پاتې نه شي.
ډېنل ویلي، په جګړه کې د امریکایانو د قربانیو لپاره هېڅ موجه دلیل نه شته او زیاته کړې یې ده چې د دوی تر ټولو ستره ستراتیژیکه خطا دا ده چې له افغانستان ژر نه دي وتلي.
دغه جنرال ویلي، امریکا ته په کار ده چې ژر له دې هېواده ووځي خو پر طالبانو باید دا ومني چې دا هېواد به شاتګ ته نه اړ باسي.
