طالبانو د یوناما راپور رد کړ چې د ولسي وګړو د مرګ ژوبلې یوازنی لامل دوی پېژندل شوي دي.
د ملګرو ملتونو په تازه راپور کې په وسلوالو ډلو نیوکه شوې چې ولسي خلک په قصدي توګه په نښه کوي.
راپور کې د جګړې په ټولو اړخونو غږ شوی چې ولسي وګړو ته پاملرنه وکړي.
ملګرو ملتونو د ولسي وګړو د مرګ ژوبلې په اړه اندېښنه لري چې د وسلوالو ډلو له اړخه په قصدي توګه په نښه کېږي.
په افغانستان کې ملګرو ملتونو موندلې، چې حکومت مخالفو ډلو په قصدي او اګاهانه ډول د روژې په میاشت کې ملکیان په نښه کړي دي چې یوازې په کابل کې څه باندې ۱۰۰ تنو ته مرګ ژوبله اوښتې ده.
خو په راپور کې یوناما د حکومت مخالف لوری هڅوي، چې په افغانستان کې پر ملکي خلکو بریدونه ودروي.
د یوناما د اعلامې یوه برخه کې داسې راغلي (( د جګړې هیڅ غاړه پر ملکیانو برید نه شې توجیه کولی او ملکیان باید په هیڅ ډول په نښه نه شي، زه د ملکي وګړو پر وړاندې دغه قصدي بریدونه غندم چې د ویرې د خپرولو د ناوړه ارادې ښکارندوی کوي؛ دغه بریدونه د عاملینو مشروعیت له منځه وړي او د افغانستان د خلکو د استازیتوب له هر ډول ادعا څخه یې محروموي))
په نړیوالو قوانینو کې د جګړې ټول ښکېل اړخونه د ملکي وګړو په وړاندې له قصدي بریدونو منع شوي او دغه ډول کړنې د جنګي جرمونو په تعریف کې شاملوي چې کیدای شي د بشر ضد جرمونو کې وګڼل شي.
خو طالبانو د یوناما راپور بیا یو اړخیز بللی دی .
ملګري ملتونه په ډاګه کوي، هغه بریدونه چې په قصدي ډول په کې ملکي وګړي په نښه کیږي، د نړیوالو بشر دوستانه قوانینو سره په ټکر کې دي.
ټینګار کېږي چې ټول اړخونه باید د نړیوالو قوانینو له مخې د ملکي وګړو د خوندیتوب لپاره خپلو مسؤلیتونو ته درناوی وکړي.
اوس د وسله والو شخړو او بشر دوستانه قوانینو ته د نه پاملرنې له امله خلک ډیر کړاوونه ګالي.
خو د ګواښ خبره داده چې د نړۍ په کچه ملکي وګړو په دوامداره توګه د تلفاتو ډیری برخه جوړوي.
