د بلخ اوسېدونکي له نامسووله وسله والو په تنګ دي او له مسوولینو غواړي چې پر وړاندې یې اقدامات وکړي.
د بلخ ولایتي شورا او مدني فعالانو له امنیې قوماندانۍ غوښتي، چې د نا مسووله وسله والو او د هغوی ملاتړو د نومونو افشا کېدو تر څنګ دې د يادو وسله والو د نيولو او ځپلو لپاره اقدامات وکړي.
ولايتي شورا او مدني فعالان زياتوي، چې د ناقانونه وسله والو په ځپلو او نیولو سره به د جرايمو کچه هم راټيټه شي. ولایتي شورا او مدني فعالان وروسته له هغې دا غوښتنه کوي، چې تازه د بلخ امنيه قومندان اجمل فایز ويلي، که دغه ولايت کې شته نا مسوول وسله وال قانون ته تسليم نشول؛ نو دوی به يې له ملاتړو سره نومونه افشا کړي.
بلخ هم په شمال کې يو له هغو ولايتونو څخه دی، چې د ناقانونه وسله والو شمېر پکې زيات او د خلکو ژوند یې ننګولی دی.
د بلخ ولایتي شورا ریس افضل حدید د امنيه قومندانۍ له دغې پرېکړې څخه د ملاتړ تر څنګ وايي، چې پوليس دې په دې برخه کې بې پرې ګامونه پورته کړي او قانون دې تطبیق کړي.
په ورته وخت کې بيا يو شمېر مدني فعالان وایي، چې يوليس دې يواځې د ناقانونه وسله والو او د هغوی د ملاتړو د نومونو پر افشا کېدو بسنه نه کوي؛ بلکې د يادو وسله والو د نيولو او ځپلو لپاره دې هم جدي ګامونه پورته کړي.
د معلوماتو له مخې په تېرو څلويښت ورځو کې د بلخ امنيه قومندانۍ دغه ولايت کې ۳۲ تنه ناقانونه وسله وال نيولي او عدلي ارګانونو ته يې معرفي کړي دي.
