کابل کې د اروپا په مرسته د افغان صادرونکو لپاره ورکشاپ جوړ شو.
د نړیوالو بازارونو له اړتیا بې خبري، نړیوالو سوداګریزو قوانینو ته نه پاملرنه، د سټنډرډونو او معیارونو په پام کې نه نیول او نورې ستونزې شته چې د افغانستان صادراتو ته په کافي اندازه بازارونه نشته.
اوس نړیوال سوداګریز مرکز د اروپا په مرسته کابل کې د افغان صادرونکو لپاره ورکشاپ جوړ کړ چې څنګه کولی شي اروپا ته د صادراتو کچه پراخه کړي.
افغان سوداګرو ته ورښودل کېږي چې د اروپا بازارونه په کوم سټنډرډ او معیار کومو موادو ته اړتیا لري، څو هماغه توکي تر اروپا ورسوي.
نړیوال سوداګریز مرکز وایي، په اوس کې افغان صادرونکي اروپا ته د صادراتو په مهال له یو شمېر ستونزو سره مخ دي.
د نړیوال سوداګریز مرکز استازي پاتریک دیبویسر داسې وویل (( د نباتاتو او غذا مصؤنیت باید له پیله تر پایه په پام کې ونیول شي او کوم صادرات چې امریکا ته ځي د امریکا په سټنډرډ او کوم چې اروپا ته ځي باید د اروپا په سټنډرډ برابر شي، موږ ځینو هېوادونو ته د اعتبار په موخه سرټیفکېټ ورکوو او بیا ترې د تل لپاره توکي اخلو، خو که معیارونه په پام کې ونه نیول شي، توکي بیرته رديږي.))
سوداګرۍ وزارت وایي، د صادراتو پراختیا د حکومت لومړیتوب دی او په پلان کې ده چې سږ کال د صادراتو کچه تر یو ملیارد ډالرو او تر ۲۰۲۱ م کال پورې دغه کچه تر دوه ملیاردو ډالرو ورسوي.
سوداګرۍ وزارت له صادراتو مخکې ارزونه کوي چې څنګه کولی شي په کور دننه صنعت ته پراختیا ورکړي، اصلاحات راولي، بازارموندنه وکړي او اسانتیاوې رامنځته کړي.
افغانستان اروپا ته وچه میوه لاسي صنایع، قالینې مرمر ډبرې زعفران او داسې نور توکي صادروي.
