ناټو په افغانستان کې د خپل ماموریت لپاره ستراتېژي بدلوي.
ناټو تر لس کلن ځنډ وروسته یو ځل بیا په افغانستان کې د خپل حضور د ستراتیژۍ د بدلون تکل کړی.
غربي رسنیو د ناټو سازمان د سرمنشي له قوله خبر ورکړی چې تر راتلونکې یوې اوونۍ به د ناټو پوځي پوهان په افغانستان کې د ستراتېژۍ بدلون رامنځته کړي.
ینس سټولنبرګ ظاهرا د افغانستان سویل او خیتځ کې نویو را ولاړو شویو ستونزو ته په پام په ستراتيژۍ له سره کتنه ښودلې ده.
ارګ وايي، ناټو دغه کار له دوی سره په مشوره کوي.
د یاد سازمان سرمنشي ویلي، تر څو چې افغانستان سولې او ټیکاو ته نه وي رسیدلی دوی له افغانستان څخه نه وځي.
خو تحلیل دا دی چې ناټو د نوې ستراتیژۍ له بدلون سره غواړي افغانستان کې جګړه مبهمه او اوږده وساتي.
ناټو اوس په افغانستان کې د غوڅ ملاتړ ماموریت په چوکاټ کې خپل فعالیتونه یوازې تر مشورو، تجهیز او روزنې محدود ګڼي.
تر اوسه د نوې اعلانېدونکې ستراتيژۍ جزیات نه دي خپاره شوي خو له دې موضوع برداشت دا دی چې ناټو له افغانستان څخه پښې سپکوي.
د ۲۰۰۲ کال نه تر ۲۰۱۴ کال پورې ناټو په افغانستان کې له طالبانو او القاعدې سره د جګړې سنګرونه خلاص ساتلي و، چې لږ تر لږ شپږ کاله وړاندې بهرنیو ځواکونو یاد مسولیت افغان ځواکونو ته ور تر غاړې کړ.
ناټو داسې مهال په دې برخه کې غور پيل کړی چې ورسره جوخت امریکا له طالبانو سره د سولې له هیلو ډکې خبرې جاري ساتلې دي، هغه خبرې چې تمرکز یې د بهرنیو ځواکونو په وتلو دی.
