حکومت د سولې خبرو لپاره له طالبانو سره د ناستې نوملړ اعلان کړ.
د قطرغونډه کې د ګډون کوونکو نوملړ اعلان شو
حکومت او سیاسیونو له اوږدو بحثونو وروسته بالاخره هغه نوملړ پاس کړ چې له طالبانو سره په جوړېدونکې ناسته کې ګډون کوي.
په دغه ۲۵۰ کسیز نوملړ کې د بیلابیلو اقشارو استازي راټول شوي چې ښځې هم په کې غوښنه برخه لري.
په ټاکل شویو دوه سوه او پنځوس کسانو کې د حکومتي او سیاسي څېرو تر څنګ مدني فعالان او لږ تر لږه دوه پنځوس مېرمنې شاملې دي.
د دې تر څنګ پخوانی ولسمشر حامد کرزی او یو شمېر نور سیاسیونو په دې ناسته کې له ګډون انکار کړی دی.
له دې وړاندې باور دا و چې په دې ناسته کې به د حامد کرزي په ګډون د مسکو غونډې مطرح څېرې په ناسته کې ګډون وکړي.
نایید شوي راپورونه دا دي چې پخوانی ولسمشر حامد کرزی او ځینې سیاسیون له حکومت سره د ګډونوالو په نوملړ او د اجنډا پر ټاکل کېدو هوکړې ته نه دي رسیدلي او له همدې امله په غونډه کې ګډون نه کوي.
طالبانو هم د ناستې لپاره د چمتوالی خبر ورکړی خو مخکې یې ویلي چې په جوړېدونکې ناسته کې به له حکومتي او سیاسیونو سره د حکومت په ادرس نه بلکې د سولې په تړاو شخصي بحثونه وکړي.
په دوحه کې به د طالبانو، افغان سیاسیونو او حکومتي چارواکو تر منځ ناسته د اپرېل په ۱۹ پيل او تر ۲۱ نیټې به دوام ورکړي.
