د طالبانو او امریکایانو تر منځ په پنځم پړاو خبرو کې پوره پرمختګ شوی خو په هیڅ مورد توافق نه دی راغلی.
طالبان او زلمي خلیلزاد د افغان سولې ټینګښت په موخه خپل اولس ورځني مذاکرات تېر ماښام پای ته رسولي اعلان کړل.
سره له دې چې دواړه لوري په دې پړاو خبرو کې پوره ستړي ښکاري خو د شپږم پړاو خبرو لپاره سره له اوسه د چمتوالي خبر ورکړی دی.
ځینې سرچینې وايي، په دې پړاو کې خبرو کې امریکا چمتو شوې چې له افغانستان څخه خپل پوځیان وباسي او طالبانو بیا ژمنه کړې چې امریکا ته د افغانستان له اړخه د ګواښ د مخنیوي تضمین ورکړي.
زلمي خلیلزاد او طالبانو ویلي، سره له دې چې خبرې له لوړو ژورو سره مل وې، خو د پام وړ پرمختګونه په کې شوي دي.
عبدالله عبدالله وايي، خبرې هغه وخت هیله بښونکې کېدای شي چې طالبان له افغانانو سره خبرو ته کیني.
د افغان سولې لپاره د امریکا ځانګړي استازي زلمي خلیلزاد داسې ویلي (( طالبانو سره مې په دوحه کې دا پړاو خبرې پای ته ورسولې. د سولې په خبرو کې پرمختګ شوی دی. دا څرګنده ده چې ټولې غاړې سوله غواړي. سره له دې چې په دې خبرو کې لوړې ژورې وې خو موږ بیا هم یو شمیر پرمختګونه کړي دي.))
د ترهګرۍ پر وړاندې پر ګډې مبارزې او د ځواکونو پر وتلو خبرې وروستۍ شوې دي.
طالبانو هم په خپره کړې اعلامیه کې ورته پیغام خپور کړی چې دواړو لورو هوکړې ته نیږدې موضوعات د مشورې او تاییدي لپاره خپلو مشرانو سره شریکوي.
د شپږم پړاو خبرو کره وخت تر اوسه مالوم نه دی خو ښايي، د روانې مارچ میاشتې په وروستیو کې بیا سره مخامخ شي.
په ټولنیزو رسنیو کې د خبرو د مثبت والي تود هر کلی شوی، خو افغان حکومت وايي، خبرو ته هغه مهال هیلې زیاتیږي چې طالبان له افغانانو سره خبرو کیني.
خو له دې ټولو ورهاخوا خلیلزاد د سولې خبرو د پوره بریا لپاره بین الافغاني خبرې، د بهرنیو ځواکونو وتل، اوربند او د افغانستان له خاورې امریکا ته د ګواښ د مخنیوي تضمین اساسي مسایل یاد کړي چې باید پرې توافق ته ورسیږي.
