پاکستان او چین په دوحه کې د روانو خبرو مثبتو پایلو ته په تمه دي.
اسلام آباد او بیجنګ په ظاهره کې له روانو خبرو ملاتړ کوي او دې ته په تمه دي چې یادې خبرې بریالي سټیچ ته ورسیږي.
په کور دننه بیا تحلیل دا دی چې د خبرو ځنډ ممکن د دواړو لورو تر منځ په ځینو مسایلو کې د نظر اختلاف وي چې په مثبتو او منفي پایلو منتج کېدای شي.
په دوحه کې د طالبانو او امریکایانو تر منځ خبرې په پنځلسمه ورځ هم روانې وې، خو د نورو ورځو په څېر بیا هم هر څه پټ و.
طالبان او امریکایان یوازې د خبرو مثبت والي ته اشاره کوي، او د رسنیو لپاره نور څه د ویلو لپاره نلري.
د سیمې هېوادونه چې د افغان سولې په برخه کې مهم اړخونه بلل کیږي، د روانو خبرو پایلو ته خوشبینه دي.
کابل کې د پاکستان سفیر زاهد نصرالله خان داسې ویلي (( په قطر کې د سولې خبرې هیله بښونکې دي، موږ په دې تمه یو چې دغه مذاکرات بریالي شي. دا به د افغانانو په مشرۍ د سولې خبرو لپاره لاره هواره کړي. پاکستان خپل رول د سولې خبرو په برخه کې په ښه توګه ادا کړی، چې طالبانو یې په دوحه کې د سولې خبرو ته کینولي. په همدې اساس باندې ملا برادر هم موږ خوشې کړ، او د پردې تر شاه پاکستان د افغان سولې په برخه کې خپل رول ادا کړی دی))
چین هم په دې برخه کې د ملاتړ او همکاریو ژمنه بیا تازه کړې.
کابل کې د چین سفیر لیو جینګ سونګ داسې ویلي ((د سولې او پخلایني په برخه کې د چین دریځ ډېر څرګند دی، موږ دا ډول ټولو خبرو ملاتړ کوو، دا خبرې باید د افغانانو په مشرۍ او د افغانانو تر منځ وي، موږ د یوه ګاونډي هېواد په توګه ستاسې ملاتړ کوو، موږ له وخت وړاندې څه نشو ویلی، او نه غواړو چې د سولې خبرې په کومه لوبه بدلې شي))
تمه دا ده چې سبا سه شنبه په دوحه کې د پنځم پړاو روانې خبرې پای ته ورسیږي.
خو تحلیل دا دی چې یوازې امریکایانو او طالبانو تر منځ افغان سولې ستونزه د حل وړ نه ده، بلکې افغان حکومت هم مهم اړخ دی.
که د سولې خبرو په تړاو هیلې شته، خو تر څنګ یې د دواړو لورو تر منځ پټو خبرو او د حکومت څنډې ته کول بیا د خراب راتلونکې په اړه هم له تشویشونو سره مل خبرې دي.
