د سولې عالي شورا تمه لري، چې د سولې خبرو کې به بیجینګ ، اسلام اباد وهڅوي.
کابل تمه لري چې د بیجینګ فشار به اسلام اباد اړ باسي چې د افغان سولې پروسه کې ریښتیني ګامونه پورته کړي .
د سولې عالي شورا وايي، چین ته د عمر داوودزي د سفر موخه هم پرپاکستان د چین هیواد فشار راوړل دي او په دې برخه کې د دغه هیواد له چارواکو سره خبرې شوي چې د ډاډ وړ دي .
د سولې عالي شورا په افغان سوله کې د چین رول چندان اغیزمن نه بولي خو تمه لري چې د چین فشارونه به پاکستان اړباسي چې له افغان سولې سره خپلې کړې ژمنې عملي کړي .
د ملي شورا غړي بیا د افغانستان په سوله کې د چین رول مهم ګڼي او وايي پر پاکستان د چین فشار به پر افغان سوله مثبته اغیز ولري، خو که دا هېواد همکاري وکړي.
که د سولې په روانو مذاکراتو کې چې د امریکا په مشرۍ له طالبانو سره خبرې روانې دي، د سیمې هیوادونه ورښکیل نه شي د ولسي جرګې دویم مرستیال امیرخان یار باور لري چې د تلپاتې سولې ټینګښت به همداسې یوه هیله پاتې شي .
خو د سولې عالي شورا هڅې پیل کړي چې د امریکا او طالبانو ترمنځ د مذاکراتو ترڅنګ د سیمې هیوادونو هغه ژمنې چې په سیمه ییزه اجماع کې یې د افغان سولې لپاره کړي په عمل کې پیاده کړي .
چین ته د داودزي له سفر سره یو ځای پاکستان کې د چین سفیر ویلي و چې دوی به طالبان د یو ځواک په توګه وپیژني.
له افغانستان سره د چین اړیکې او دې ډول څرګندونو شک پيدا کړی و چې چین هيڅکله نه غواړي چې د نورو هېوادونو لپاره خپل ستراتيژيک ملګری پاکستان خفه کړي او یا یې تر فشار لاندې ونیسي.
