کابل کې د افغان پوځ له تعلیمي مرکز شاوخوا پنځلس سوه سرتیري فارغ شول.
دلته د افغان پوځ له نظامي مرکز دغه شاوخوا پنځلس سوه سرتیرو د فراغت د مراسمو تر څنګ د رجال برجسته یو شمېر سرتېري هم فارغ شول.
مسولینو سرتیرو ته لارښوونه وکړه چې د وسله والو له اسیرانو او ټپيانو سره انساني برخورد وکړي او وژل شوي هغه یې په درنښت انتقال کړي.
د پوځ مسولینو جګړې ته چمتوالی وښود خو د مقابلې موخه یې سوله یاده کړه.
تازه فارغ شویو خپل فراغت په ملي ترانو بدرګه کړ، او له دې وروسته به همدا ترانې د جګړې تر لومړۍ کرښې یوسي.
مراسمو ته د افغان پوځ مسولین هم راغلي وو او سرتیرو ته یې سپارښتنه دا وه، چې د وسله والو له اسیرانو او ټپيانو سره ښه سلوک وکړي.
د افغان سولې ورستیو هڅو په اړه که څه هم دوی خوشبین دي خو ټينګار یې دا دي، چې د جګړهایزې مقابلې موخه یې د سولې راتګ دی.
هاخوا بیا تازه فارغ شوي سرتیري که څه هم وسله والو ته د سولې پيغام لري، خو له خاورې نه د دفاع په موخه هر ډول سرښندنې ته چمتوالی ښيي.
د افغان پوځ نظامي مرکز شاوخوا څوارلس کاله وړاندې رامنځته شوی، او تر اوسه ترې له دوه سوه زره زیات سرتیري بریدملان او افسران فارغ شوي دي.
