طالبانو ویلي، که امریکا د سرتېرو په اېستلو باندې بحث نه کوي نو د سولې خبرې به وځنډوي.
طالبانو په یوې اعلامیې کې ویلي چې امریکا هڅه کوي د نورو هېوادونو په وسیله پر طالبانو فشار راولي او پخپل سر د سولې خبرو په اجنډا کې تغیر راولي.
طالبانو ګواښ کړی، که امریکا خپل دریځ ته دوام ورکړي، نو دوی به اړ شي چې له امریکا سره ټولې خبرې وځنډوي.
طالب ویاند ذبیح الله مجاهد رسنیو ته په استول شوې اعلامیه کې لیکلي، څوک چې غواړي افغانستان کې شخړه د خبرو له لارې حل کړي، نو د قطر دفتر دروازې یې پر مخ خلاصې دي.
مجاهد ویلي، په دې برخه کې به د هېچا فشار ته تسلیم نه شي او نه دې څوک خپلې ګټې په فشارونو کې ویني.
د طالبانو دغه څرګندونې داسې مهال کېږي چې دا څوم ځل دی چې د افغان سولې لپاره د امریکا استازی خلیلزاد د سیمې هېوادونو ته سفرونه کوي.
له دې سره ولسمشر محمد اشرف غني له خلیلزاد سره ولیدل.
تېره شپه زلمي خلیلزاد له ولسمشر غني سره لیدلي او سیمې ته یې د خپلو سفرونو په تړاو مالومات ورکړي دي.
په دغه لیدنه کې چې د افغان حکومت لوړپوړو چارواکو او سیاسي مشرانو هم ګډون درلود، خلیلزاد ویلي، د سفر موخه یې افغان سولې پروسې لپاره د سیمه ییزې اجماع رامنځته کول و او دغه ډول سفرونو ته به دوام ورکړي.
ولسمشرۍ ماڼۍ ویلي، لیدنه کې ولسمشر ټینګار کړی چې افغانستان کې د سولې لپاره اجماع شته او سولې خبرې باید د افغانانو په مشرۍ او مالکیت وي.
ټاکل شوې چې خلیلزاد یو ځل بیا پاکستان ته لاړ شي او د دغه هېواد له چارواکو سره به د افغان سولې برخه کې پنځه ورځې خبرې وکړي.
د پاکستان رسنیو د راپور له مخې، زلمی خلیلزاد او د امریکا د ملي امنیت په شورا کې د جنوبي او منځنۍ آسیا د چارو مسوله لیزا کرټیس به پاکستان کې پنځه ورځې پاتې شي او له پاکستاني چارواکو سره به په افغانستان کې د سولې د پروسې په اړه خبرې وکړي.
خو یو شمېر سیاسیون بیا تل د پاکستان پر نیت شک کوي چې په افغان سوله کې منډ ترړې د دې لپاره کوي چې په نړیواله کچه امتیاز ترلاسه کړي او په ځانګړې توګه د سعودي عربستان مرستې جلب کړي.
