امریکا په سوریه کې خپلو پاتې کیدو ته پلمې لټوي.
د روسیې د بهرنیو چارو وزارت ویانده ماریا زخروفا پر امریکا له سوریې د وتلو پر سر نیوکه وکړه.
د روسیې بهرنیو چارو وزارت وايي، امریکا له پیله په سوریه کې په غیر قانوني توګه پاتې وه او غوره ده چې اوس و وځي.
روسیه ټینګار کوي چې امریکا دې تر خپلې ولکې لاندې سیمې د کرد ملیشو پر ځای د بشارالاسد حکومت ته وسپاري.
ماریا زخروفا وايي؛ امریکا له سوریې د وتلو په درشل کې ده خو زړه یې نه غواړي چې له دغې هیواده و وځي او ددې لپاره ځان ته پلمې ګوري.
د روسیې د بهرنیو چارو وزارت ویاندې ماریا زخروفا داسې ویلي (( اوس موږ فکر کوو چې امریکا بهانه ګوري چې سوریه کې پاتې شي. موږ همداسې حدس وهو ، موږ غواړو چې په دې تړاو د روسیې سټراټيژي وګورو او د هغوی پر سټراټيژۍ پوه شو.))
زخروفا نیوکه کوي چې دوی تر امریکا وړاندې په سوریه کې و او له ترکیې سره یې له وړاندې د خوندي ځایونو د جوړولو په تړاو تړون درلود.
ماریا زخروفا داسې ویلي (( موږ اوس هم د ترکیې او روسیې تړون ته ژمن یو، موږ له وړاندې غوښتل چې په سوریه کې د وضعیت د کنټرول لپاره خوندي ځايونه جوړ کړو. دا تړون موږ د ۲۰۱۷ کال په سپټمبر کې په دې تړاو خبرې کړې وې چې په ایدلیب ښار کې خوندي ځایونه جوړو. موږ ویره درلوده چې اوربند به بیا هم مات شي.))
د روسیې د بهرنیو چارو وزارت دغې ویاندې پر امریکايي او نړیوالو ځواکونو تور پورې کړ چې تر اوسه یې په سوریه کې شتون غیر قانوني وو او باید له سوریې وتلي وای.
((امریکايي او نور نړیوال ځواکونه په غیر قانوني توګه سوریې ته تللي وو. او باید یې په پای کې دا هیواد پریښی وای. هغه سیمه به امریکايانو له وتلو وروسته د سوریې حکومتي ځواکونو له لوري په بشپړه توګه تصفیه شي.))
روسیه دا خبرې وروسته له هغې کوي چې امریکا وايي راتلونکې فیبروري میاشت کې به په پولنډ کې د سوریې په تړاو ستر کنفرانس جوړ کړي.
امریکا وايي؛ روسیه او ایران به اړ کړي چې په دغه غونډه کې برخه واخلي.
