دغه ماشوم چې د مغزو په ناعلاجه ناروغۍ اخته دی اوس یې مور ته د امریکا د ورتلو لپاره ویزه ورکړل شوه.
ډونالډ ټرمپ د رسنیو د پرلپسې راپورونو او خلکو په غوښتنه هغې یمنۍ مور ته ویزه ورکړه چې دوه کلن زوی یې په امریکايي روغتون کې بستر دی.
ټرمپ، واک ته له رسیدو وروسته د منځني ختيځ د یو شمیر هیوادونو پر اوسیدونکو د امریکا ویزې بندې کړي او امریکا ته د ورتګ اجازه نه ورکوي.
د شیمې ټوله کورنۍ په امریکا کې اوسیږي او د دغه هیواد تابعیت لري خو شیمه یمني تابعیت لري او د همدې لپاره ورته اجازه نه ورکول کیږي.
د شیمې خاوند علي حسن تیره ورځ له ټولو رسنیو وغوښتل چې غږ یې سپینې ماڼۍ ته ورسوي.
د یمني ماشوم پلار علي حسن داسې ویلي (( له تاسې ټولو مننه چې دلته راغلي یاست، زه نن دلته ځکه راغلی یم چې عبدالله زوی مې مور ته ډيره اړتیا لري، زما مېرمن هره ورځ ماته زنګ وهي او راته وايي چې زوی مې ښکل کړم، وخت ډير کم، ماسره مرسته وکړئ چې کورنۍ مې بیا سره یو ځای شي.))
امریکا کې مېشت یمني وګړي او اسلامي کمیټې غړي وايي؛ پر مسلمانانو بندیز ډير کسان زیانمن کړي او که اجازه ورکړل شي د شېمه د ورتګ ټول لګښت دوی ورکوي.
د اسلامي کمیټې غړي باسېم الکره داسې ویلي (( اوس موږ پوهیږو چې پر مسلمانانو بندیز په بیلابیلو غیرانساني لارو پلی کیږي، او له موږ سره وخت ډير کم دی. موږ پر بهرنیو چارووزارت غږ کوو چې شیمې ته اجازه ورکړي، ځکه خاوند او زوی یې امریکايي تابعیت لري، که امریکا ویزه ورکړه موږ یې د راتګ ټول لګښت ورکولو ته چمتو یو.))
د حسن دوه کلن زوی له اوږدې مودې راهیسې د مغزو له شدیدې ناروغۍ رنځیږي.
اوس شیمه له ویزې وروسته امریکا ته روانه شوې او په پام کې ده چې نن ماښام هلته ورسیږي.
